پەتروپاۆلدا قازاقستاننىڭ تمد ەلدەرى ىشكى ىستەر مينيسترلەرىنىڭ كەلىسىمى بويىنشا وتكىزىلەتىن حالىقارالىق «ىزدەۋ» جەدەل-پروفيلاكتيتيكالىق شاراسى ناۋرىزدىڭ 18 مەن 19 كۇندەرى جۇرگىزىلگەن ەدى.
سقو پوليتسەيلەرىنىڭ قىلمىسكەرلەردى اۋلاۋى جەمىستى بولىپ, ناق وسى كۇنى تمد ەلدەرىنىڭ سوت تورەلىگىنەن جاسىرىنىپ جۇرگەن سەگىز قىلمىسكەر بىردەن ۇستالدى. سولتۇستىك قازاقستان وبلىسى پد كريمينالدى پوليتسيا باسقارماسىنىڭ باستىعى, پوليتسيا پولكوۆنيگى پەتر كليموۆتىڭ ايتۋىنا قاراعاندا: «تمد ەلدەرى ىشكى ىستەر مينيسترلەرىنىڭ اراسىندا قول قويىلعان كەلىسىمگە سايكەس مۇنداي ءىس-شارا تۇراقتى تۇردە جۇرگىزىلەدى. قازىر جەدەل اقپاراتپەن الماسۋ دا جەتىلدىرىلگەن. شاراعا پوليتسيانىڭ باسقا بولىنىستەرىنىڭ كۇشتەرى دە تارتىلعان».
ۇستالعانداردىڭ اراسىنداعى ءتورت قازاقستاندىق جانە ءبىر رەسەي ازاماتى ەسىرتكى قىلمىستارىن جاساعانى, جالعان قۇجاتتار ىستەگەنى, پاراقورلىق, ەكسترەميستىك ءىس-ارەكەت جاساۋعا شاقىرعانى جانە توناعانى ءۇشىن رەسەيلىك پوليتسيانىڭ ىزدەستىرۋىندە بولعان. وسى قىلمىسكەرلەردىڭ ءبارى ەندى رەسەيگە ەتاپپەن اتتاندىرىلاتىن بولدى.
بۇلاردان باسقا پاۆلودار وبلىسىنىڭ 24 جاسار تۇرعىنى دا ۇستالىپ, قاماۋعا الىندى. ول ءوزى تۇرعان ەرتىس اۋدانىندا بىرەۋلەردەن كومپيۋتەردى جوندەۋگە الىپ, ەكى ايدىڭ ىشىندە يەسىنەن قوسالقى بولشەكتەرگە دەپ 88 مىڭ اقشا الىپ, بوي جاسىرىپ ءجۇر ەكەن. وعان قارسى قىلمىستىق كودەكستىڭ 90-بابى - «الاياقتىق» بويىنشا ءىس سوتقا جولدانعانىمەن كۇدىكتى ءىزىن سۋىتقان. ەندى ول دا ۇستالىپ, پاۆلودارعا جىبەرىلەدى.
سونداي-اق سقو-دا شارتتى تۇردە مەرزىمىنەن بۇرىن بوساتۋ رەجىمىن ورىنداۋدان جالتارعان ەكى ادامنىڭ جۇرگەنى انىقتالدى. ولار ىشكى ىستەر ورگاندارىن حاباردار ەتپەي, تۇرعىلىقتى جەرىن اۋىستىرۋ تالابىن ەلەمەگەن. ەكەۋى دە قاماۋعا الىندى.
سولتۇستىك قازاقستان وبلىسى