فۋتبولدان قازاقستان ۇلتتىق قۇراماسىنىڭ وسى ايعا جوسپارلانعان ەكى جولداستىق ماتچى كوروناۆيرۋسقا بايلانىستى وتپەيتىن بولدى. بۇل تۋرالى قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆ مالىمدەدى.
«فۋتبولدان قازاقستان ۇلتتىق قۇراماسىنىڭ ناۋرىز ايىنا جوسپارلانعان ەكى بىردەي جولداستىق كەزدەسۋىن وتكىزۋدەن باس تارتتىق. بۇل شەشىمدى ارمەنيا جانە ليتۆاداعى ارىپتەستەرىمىزبەن كەلىسە وتىرىپ قابىلدادىق. دەسە دە, الەمدەگى جانە ەلدەگى جاعداي ءبىر قالىپقا تۇسسە, اتالعان قۇرامالارمەن ماۋسىم ايىندا جولداستىق كەزدەسۋ وتكىزىپ قالۋىمىز مۇمكىن» دەدى ءا.جاقسىبەكوۆ.
ايتا كەتەيىك, قازاقستان فۋتبول قۇراماسى 27 ناۋرىزدا ليتۆا, 30 ناۋرىزدا ارمەنيا قۇراماسىنا قارسى جولداستىق ماتچ وتكىزۋى كەرەك ەدى. كەزدەسۋ الماتىداعى ورتالىق ستاديوندا وتەدى دەپ جوسپارلانعان بولاتىن.