بەلارۋس رەسپۋبليكاسىنىڭ برەست قالاسىندا كەدەن وداعىنا مۇشە مەملەكەتتەردىڭ 34-ءشى كەدەن قىزمەتتەرىنىڭ بىرىككەن القاسىنىڭ وتىرىسى ءوتتى. بۇل تۋرالى قارجى مينيسترلىگىنىڭ ءباسپاسوز قىزمەتى حابارلادى.
جيىنعا قارجى مينيسترلىگىنىڭ مەملەكەتتىك كىرىستەر كوميتەتى توراعاسىنىڭ ورىنباسارى جايدار ىڭكارباەۆ, حالىقارالىق باسقارۋ باسقارماسىنىڭ باسشىسى ەرمەك قوجابەرگەنوۆ جانە بەلارۋس رەسپۋبليكاسىنداعى قازاقستان رەسپۋبليكاسى كەدەن قىزمەتى وكىلدىگىنىڭ قىزمەتكەرلەرى مارينا داۆيدوۆسكايا جانە باحىتبەك سەيدالين قاتىستى.
وتىرىس شەڭبەرىندە كەدەندىك وپەراتسيالاردى وڭتايلاندىرۋعا باعىتتالعان بىرقاتار شەشىم قابىلداندى. اتاپ ايتقاندا, كەدەن ورگاندارىنىڭ كەدەندىك ترانزيتتەۋ بارىسىندا تاۋاردى تيەۋ نەمەسە تيەمەۋ فاكتىسىن ايقىنداۋ, تراكتورلار, شاعىن تراكتورلار, موتوكۋلتيۆاتورلاردى جەكە ماقساتتا پايدالانۋ ساناتىنا جاتقىزۋ نەمەسە ول ساناتتان الىپ تاستاۋ, قىتاي-ەۋروپا-قىتاي نەمەسە وزگە دە باعىتتاردا تەمىرجول ارقىلى تاۋارلاردى كونتەينەرلەرمەن تاسىمالداۋ بارىسىندا ناۆيگاتسيالىق قۇرىلعىلاردى (پلومبا) پايدالانۋ جونىندە پيلوتتىق جوبانى ۇيىمداستىرۋ.
كەدەن وداعىنا مۇشە مەملەكەتتەردىڭ كەدەن قىزمەتتەرىنىڭ بىرىككەن القاسىنىڭ جانە ونىڭ جانىندا جۇمىس ىستەيتىن جۇمىس توپتارىنىڭ 2020 جىلعا ارنالعان جۇمىس جوسپارى بەكىتىلدى.
وتىرىس اياسىندا قازاقستاندىق تاراپ كۇن تارتىبىنە كەلەسىدەي ماسەلەلەردى ەنگىزدى:
- كولىك قۇرالدارىنىڭ وتۋىنە رۇقسات بەرۋدى باقىلاۋدىڭ تيىمدىلىگىن ارتتىرۋ;
- ەۋرازيالىق ەكونوميكالىق وداقتىڭ سىرتقى ەكونوميكالىق قىزمەتىنىڭ بىرىڭعاي تاۋار نومەنكلاتۋراسىنا سايكەس «وزدىگىنەن قوزعالمايتىن جۇزبەلى قوناق ءۇي» تاۋارىن بەلگىلى ءبىر ساناتقا جاتقىزۋ.
وتىرىس قورىتىندىسى بويىنشا كەدەن قىزمەتتەرىنىڭ بىرىككەن القاسىنىڭ 24 شەشىمىن قابىلداۋ تۋرالى حاتتاماعا قول قويىلدى.