بيىل ماۋسىم ايىندا شىمكەنت قالاسىنىڭ باستى تۋريستىك نىسانىنا اينالادى دەپ جوسپارلانىپ وتىرعان تسيتادەل قامالىنىڭ اشىلۋى جوسپارلانۋدا. وسى ورايدا قازاقستاننىڭ تۋريستەندىرۋ كارتاسىنىڭ توپ-50 نىسانىنا ەنگىزىلگەن «ەسكى قالاشىق» كەشەنىنىڭ شەبەر-جوسپارى ازىرلەنبەك. بۇل تۋرالى اقپاراتتىق-كوممۋنيكاتسيا ورتالىعىندا وتكەن ءباسپاسوز بريفينگىندە شىمكەنت قالالىق تۋريزم باسقارماسى باسشىسىنىڭ مىندەتىن ۋاقىتشا اتقارۋشى ازامات قالقاباەۆ مالىمدەدى.
ازامات مۇراتبەك ۇلىنىڭ ايتۋىنشا, «مادەني استانا» اياسىندا كەلەتىن قوناقتار مەن جالپى قالاعا كەلۋشى تۋريستەرگە اقپاراتتىق جانە كونسۋلتاتسيالىق كومەك كورسەتۋ ماقساتىندا 20 ناۋرىزعا دەيىن قالادا 5 تۋريستىك اقپاراتتىق دۇڭگىرشەك ورنالاستىرىلماق.
قازاق, ورىس جانە اعىلشىن تىلدەرىندە QR-تولقۇجاتتار ورنالاستىرىلۋدا. بۇگىنگى كۇنى 20 نىسانعا تولقۇجات قويىلسا, 20 ناۋرىزعا دەيىن قوسىمشا 10 نىسانعا ورنالاستىرىلماق. بۇل QR-تولقۇجاتتارعا اۋديوگيدتەر جازىلىپ, IZI travel حالىقارالىق تۋريستىك پلاتفورماسىمەن ينتەگراتسيالانعان.
سونىمەن قاتار, تۋريستىك نىساندارعا باعىتتايتىن ستەللالار ازىرلەنۋدە. جاقىن تۇرعان تۋريستىك نىسان تۋرالى اقپارات بەرىپ, كارتادا ونىڭ ورنالاسۋ نۇكتەسىن كورسەتە الاتىن ستەلالار قالانىڭ 30 نۇكتەسىندە مامىر ايىنىڭ باسىنا دەيىن قويىلادى.
بۇعان قوسا مامىر ايىندا تۋريستەرگە اقپارات بەرەتىن تابلولارعا قالانىڭ 3D تۋريستىك كارتاسى ەنگىزىلەدى.
– «مادەني استانا» اياسىندا جانە قالاعا كەلەتىن وزگە دە قوناقتاردى شىمكەنت قالاسىنىڭ كورىكتى جەرلەرىمەن تانىستىرۋ ماقساتىندا تۋريزم باسقارماسى تاراپىنان جارنامالىق-اقپاراتتىق بۇكتەمەلەر, كارتالار, سونداي-اق, «شىمكەنت – تمد ەلدەرىنىڭ مادەني استاناسى» ءىس-شاراسىنىڭ سەرىكتەسى تاقتايشالارى مەن جابىستىرمالارى ازىرلەنىپ, قالاداعى قوناق ۇيلەر مەن اۋەجايدا ورنالاستىرىلسا, ارنايى دايىندالعان توسبەلگىلەر قوناق ۇيلەرگە تاراتىلدى. 20 ناۋرىزعا دەيىن قوسىمشا توسبەلگىلەر «SCAT» اۋەكومپانياسىنىڭ بورتسەرىكتەرىنە ۇسىنىلادى. قازاقستاندىق جانە شەتەلدىك ازاماتتارعا شىمكەنت تۋرالى كەڭىنەن اقپارات تاراتۋ ماقساتىندا Instagram, facebook الەۋمەتتىك جەلىلەرىندە visit_shymkent_kz پاراقشاسى جۇمىس ىستەپ تۇر. بۇگىنگى تاڭدا تۋريزم باسقارماسى تاراپىنان تسيتادەل قامالىنىڭ VR-روليگى ازىرلەنۋدە, - دەدى باسقارما باسشىسىنىڭ مىندەتىن اتقارۋشى.
سونداي-اق, «رۋحاني جاڭعىرۋ» باعدارلاماسى شەڭبەرىندە 2020 جىلدىڭ ەكىنشى جارتىسىندا «تۋريستىك كلۋب» اشۋ جوسپارلانۋدا. ونىڭ باستى ماقساتى – تۋريزم ماماندارىن جاستايىنان دايىنداۋ, وقىتۋ.
ءساۋىر ايىندا «اربات» جاياۋ جۇرگىنشىلەر كوشەسىندە ەكىنشى «قىزعالداق جولى» مەرەكەلىك فەستيۆالى وتەتىن بولادى. بۇدان بولەك, قر پرەزيدەنتىنىڭ 2019 جىلعى قىركۇيەكتەگى حالىققا جولداۋىندا ايتىلعانداي, ەتنو-ءتۋريزمدى دامىتۋ, سونداي-اق, تمد ەلدەرىنەن كەلەتىن قوناقتارعا ۇلتتىق قولونەردى ناسيحاتتاۋ ماقساتىندا ءساۋىر ايىندا «ەتنو شىمكەنت» قولونەرشىلەر فەستيۆالى, قازان ايىندا ء«دامدى شىمكەنت» گاسترونوميالىق فەستيۆالى وتەدى.
بۇل فەستيۆالدى بۇدان ءارى جىل سايىنعا داستۇرگە اينالدىرۋ جوسپاردا بار. قالانىڭ تۋريستىك تارتىمدىلىعىن ناسيحاتتاۋ, ىشكى جانە كىرۋ ءتۋريزمىن دامىتۋ ماقساتىندا بيىل شەتەلدىك تۋروپەراتورلارعا, باق وكىلدەرى مەن بلوگەرلەرگە اقپاراتتىق تۋر ۇيىمداستىرىلماق. قازىرگى تاڭدا الەمدە قالىپتاسقان جاعدايعا بايلانىستى اتالعان تۋرلاردى 2020 جىلدىڭ ەكىنشى جارتىسىنا قالدىرۋ تۋرالى شەشىم قابىلدانعان.