ترەكتەگى ۆەلوسپورتتان قازاقستان قۇراماسى تورتجىلدىقتىڭ باستى دوداسىنا ءۇش جولداما جەڭىپ الدى, دەپ حابارلادى ۇوك ءباسپاسوز قىزمەتى.
توكيو وليمپياداسىنا ەل قۇراماسىنان ءۇش سانات (سپرينت, ومنيۋم, كەيرين) بويىنشا ەكى سپورتشى باق سىنايدى. تورتجىلدىقتىڭ باستى دوداسىنا باراتىن سپورتشىلار ءتىزىمىن قازاقستان ۆەلوسپورت فەدەراتسياسى كەيىنىرەك ۇسىنادى.
ايتا كەتەرلىگى, سپرينت بويىنشا قازاقستان تاريحي جولداماعا قول جەتكىزىپ وتىر. سەبەبى وسى ۋاقىتقا دەيىن قازاقستاندىق سپورتشىلار اتالعان سانات بويىنشا وليمپيا ويىندارىنا قاتىسپاعان. قازاقستان قۇراماسىنا تيەسىلى جولدامانى الۋ جولىندا ارتەم زاحاروۆ پەن سەرگەي پونومارەۆتىڭ كوپ ەڭبەگى ءسىڭدى. اتالعان سپورتشىلار بەرليندە وتكەن الەم چەمپيوناتىندا ۇزدىك وندىققا ىلىنگەن بولاتىن.
قازىرگى تاڭدا قازاقستان قۇراماسىندا توكيودا وتەتىن جازعى وليمپيا ويىندارىنا 41 ليتسەنزيا بار.