بۇگىن يوردانيانىڭ باس شاھارى – امماندا بوكستان توكيو وليمپياداسىنا جولداما بەرەتىن ازيا جانە تىنىق مۇحيتى ايماعى ءتۋرنيرىنىڭ جارتىلاي فينالى ءوتىپ جاتىر.
قازاقستاندىق بوكسشىلاردان كۇندىزگى سەسسيانى تۇيىندەگەن ريو وليمپياداسىنىڭ قولا جۇلدەگەرى ۆاسيلي لەۆيت (91 كگ) جارتىلاي فينالدا يوردانيالىق بوكسشى حۋسسەين ءيشايشتى جەڭىپ, فينالدىق جەكپە-جەكتە جۇدىرىقتاسۋعا مۇمكىندىك الدى.
تەڭ دارەجەدە وتكەن العاشقى راۋندتا تورەشىلەر شارشى الاڭ قوجايىندارىنىڭ بوكسشىسى 5:0 ەسەبىمەن جەڭىسكە جەتتى دەپ ەسەپتەدى. ال ەكىنشى راۋندتا تورەشىلەر جەڭىستى ءبىر اۋىزدان وتانداسىمىزعا بەرگەن بولاتىن. سوڭعى شەشۋشى راۋندتا شيراق قيمىلداپ, قارسىلاسىنان ءبىر باس جوعارى ونەر كورسەتكەن ۆاسيلي لەۆيت ءوز مىقتىلىعىن دالەلدەدى.
ايتا كەتەيىك, بۇعان دەيىن قازاقستاندىقتاردان 63 كيلوداعى زاكىر سافيۋللين فينالعا شىققان بولسا, 69 كيلوداعى ابىلايحان ءجۇسىپوۆ جارتىلاي فينالدا سۇرىنگەن ەدى.
فوتو: دانيار مايلىباەۆ