«اۋىل» پارتياسىنىڭ سولتۇستىك قازاقستان وبلىستىق فيليالىنىڭ وكىلدەرى پەتروپاۆل قالاسىندا تۇراتىن 15 بالالى وتباسىن كوكتەم مەرەكەسىمەن قۇتتىقتادى. 20 جىل بۇرىن ۇيلەنگەن پاۆەل مەن تايانا كۋلتىشەۆتار بالالاردى جاقسى كورەتىن بولعاندىقتان وسىنشا سابيگە ءومىر بەرگەن ەكەن.
سەگىز ۇل مەن جەتى قىزدىڭ ەڭ ۇلكەنى 18 جاستاعى يننا. «الدىڭعى اربا قايدا جۇرسە, سوڭعىسى سوندا جۇرەدى» دەگەن ەمەس پە, مۋزىكاعا قابىلەتى بار يننانىڭ جولىن ارتىنداعى ءۇش ءسىڭلىسى دە جالعاستىرۋدا ەكەن. يننانىڭ ءوزى فورتەپيانودا ويناسا, لەنا فلەيتادا, يرا مەن تانيا سكريپكادا وينايتىن كورىنەدى. ال ۇل بالالار ورىستىڭ حالىق اسپابى - بالالايكا مەن اكككوردەوندا جاقسى تارتادى ەكەن, ءسويتىپ, وتباسىلىق انسامبل دە قۇرىپ الىپتى.
تەمىرعالي تەكەباس ۇلى باستاعان «اۋىلدىقتار» توبى وسى وتباسىن كوكتەم مەرەكەسىمەن قۇتتىقتاپ, تۋعان وتاندارىنا ادال قىزمەت ەتىپ, كورگەندى ازامات بولۋلارىن تىلەدى جانە اپارعان باعالى سىيلىقتارىن تاپسىردى.
«قازاقستان رەسپۋبليكاسىنىڭ بارلىق ازاماتى تەڭ قۇقىقتى, مەملەكەت بارىنە بىردەي قامقورلىقتار جاساۋدا. ەرتەڭ-اق سەندەر دە وتانىمىزدىڭ بىلىكتى دە ءبىلىمدى ازاماتى بولاسىزدار. سول كۇنگە امان جەتىڭىزدەر!» دەدى ول بالالارعا.
كەلگەندەر بالالاردىڭ ءبارى جاقسى تاربيە الىپ كەلە جاتقاندىعىنىڭ كۋاسى بولدى. ءبارى دە وقۋعا ىنتالى, ادامگەرشىلىكتەرى دە جاقسى, ءتارتىپتى بالالار ەكەنى كورىنىپ تۇر. كەزبەلىك, قاڭعىباستىق دەگەن بۇل ءۇيدىڭ بالالارىنا جات قىلىق ەكەن. ءبارى دە كەلگەن قوناقتارعا قۇرمەت كورسەتىپ, سۇراعان ساۋالدارعا ىجداھاتپەن جاۋاپ بەرىپ جاتتى.
بالالاردىڭ اناسى تاتيانا كۋلتىشەۆا كىشكەنتايلاردى ويناتۋ, تاماقتاندىرۋ, كيىندىرۋ جۇمىستارىنا ۇلكەندەردىڭ كوپ كومەك بەرەتىنىن ايتتى.
«ۇلكەن بالالارىم كومەكتەسپەسە بارىنە ۇلگەرۋ قيىن. قىزدارىمنىڭ الدى ءۇي جيناۋ, تاماق ءپىسىرۋ, كىر جۋ جۇمىستارىنا دا كومەكتەسەدى. ءتىپتى, ءىس تىگۋ سياقتى جۇمىستاردى دا سولار اتقارادى» دەدى ول.
پاۆەل كۋلتىشەۆتىڭ ءوزى ون قولىنان ونەر تامعان شەبەر كورىنەدى. ول اۆتوموبيل جوندەۋ, دانەكەرلەۋ جۇمىستارىن جەڭىل اتقارا بەرەتىن كورىنەدى. قازىرگى تۇرىپ جاتقان ۇيلەرىن دە ءوز قولىمەن كەڭەيتىپ العان ەكەن. ۇلكەن ۇلدار بۇل ىستە اكەلەرىنىڭ سەنىمدى كومەكشىسى بولا بىلگەن.
قازىر كۋلتىشەۆتەرگە قالتالى ازاماتتار ۇلكەندەۋ ميكرواۆتوبۋس تا الىپ بەرىپتى. الايدا بۇل وتباسى بىرەۋدەن بىردەڭە سۇراپ, تالاپ ەتىپ, قول جاياتىن ادامدار ەمەس. ءبارىن دە ءوز مۇمكىندىكتەرىمەن جاساعىسى كەلەتىن كورىنەدى.
سولتۇستىك قازاقستان وبلىسى