مەملەكەت باسشىسىنا ۇلتتىق مۇناي-گاز كومپانياسىنىڭ 2019 جىلعى جۇمىستارىنىڭ قورىتىندىلارى جانە الداعى كەزەڭگە ارنالعان دامۋ جوسپارلارى جونىندە باياندالدى. بۇل تۋرالى اقوردانىڭ ءباسپاسوز قىزمەتى حابارلادى.
قاسىم-جومارت توقاەۆقا «قازمۇنايگاز» ۇك اكتسيونەرلىك قوعامىنىڭ قاتىسۋىمەن جۇزەگە اسىرىلىپ جاتقان ءىرى ينۆەستيتسيالىق جوبالار, الەمنىڭ كوپتەگەن ەلىنە كوروناۆيرۋس ىندەتىنىڭ تارالۋىنا بايلانىستى كومپانيانىڭ قابىلداعان شارالارى تۋرالى مالىمەت بەرىلدى. سونىمەن قاتار كومپانيادا قىزمەتكەرلەردىڭ شەتەلدىك ءىسساپارلارىنا شەكتەۋ قويىلىپ, ءوندىرىس ورىندارى مەن وفيستەردە الدىن الۋ شارالارى قابىلدانعان.
مەملەكەت باسشىسى ۆيرۋستىڭ ءوندىرىس ۇدەرىسىنە جانە ينۆەستيتسيالىق جوبالاردىڭ جۇزەگە اسىرىلۋىنا كەرى اسەرىن ازايتۋ جونىندە شارالار قابىلداۋدى تاپسىردى.