25 ناۋرىزدا الماتىداعى مەملەكەتتىك تسيركتە كاسىپقوي بوكستان حالىقارالىق تۋرنير وتەدى.
جالعاس تۇكەشوۆتىڭ پروموۋتەرلىك كومپانياسى ۇيىمداستىرىپ وتىرعان وسى جارىستىڭ باستى جەكپە-جەگىندە قازاقستاندىق ەدىل كوجامبەرديەۆ پەن وزبەكستاندىق مۇحيتدين رادجاپباەۆ كۇش سىناسادى. اۋىر سالماقتا جۇدىرىقتاسىپ جۇرگەن قوس بىلعارى قولعاپ شەبەرلەرىنىڭ دە ەسىمدەرى جانكۇيەرلەرگە تانىس.
33 جاستاعى ەدىل قوجامبەرديەۆ كاسىپقوي رينگتە 11 جەكپە-جەك وتكىزىپ, توعىزىندا جەڭىسكە جەتتى. باسىمدىق تانىتقان باسەكەلەرىنىڭ بارلىعىن نوكاۋتپەن ۇتتى. ەكى رەت ۇپاي سانىمەن ۇتىلدى. 32 جاستاعى مۇحيتدين رادجاپباەۆ 18 رەت شارشى الاڭعا كوتەرىلىپ, 10 رەت جەڭىسكە جەتتى. جەتى ايقاستى مەرزىمىنەن بۇرىن اياقتادى. جەتى مارتە جەڭىلىپ, تاعى ءبىر كەزدەسۋدە تەڭ ەسەپ تىركەلدى.
ايتۋلى جارىستا ۇيىمداستىرۋشىلار تاراپىنان 14 جەكپە-جەك وتكىزۋ جوسپارلانىپ وتىر. شارشى الاڭعا شىعاتىندار قاتارىندا ارمان رىسبەك, داستان ءسادۋ ۇلى, بەرىكباي نۇرىمبەتوۆ, ايدوس مەدەت جانە تاعى باسقا بوكسشىلار بار.