حالىقارالىق بوكس فەدەراتسياسى (IBO) بارلىق سالماق دارەجەسىندەگى بوكسشىلار رەيتينگىنىڭ جاڭارتىلعان نۇسقاسىن جاريالادى. بۇل تۋرالى Sport.kz حابارلادى.
نازارلارىڭىزعا قازاقستان بوكسشىلارىنىڭ ورىندارىن ۇسىنامىز:
اسا اۋىر سالماقتاعى يۆان دىچكو 76-شى ورىننان 77-ءشى ورىنعا سىرعىپ, رۋسلان مىرساتاەۆ 88-ءشى ورىنعا تۇراقتادى. IBO Inter-Continental چەمپيوندىق بەلبەۋى جان كوسوبۋتسكيگە تيەسىلى. ءبىرىنشى اۋىر سالماقتاعى ءالي بالوەۆ 80-ءشى ورىننان 79-شى ورىنعا, ەدىل قوجامبەرديەۆ 89-شى ورىنعا كوتەرىلدى (91-ءشى ورىندا بولعان).
ەكىنشى ورتا سالماقتاعى بوكسشى ايدوس ەربوسىن ۇلى 17-ءشى ورىنعا تابان تىرەدى, نۇرزات سابيروۆ 34-ءشى ورىننان 30-شى ورىنعا, الي احمەدوۆ 32-ءشى ورىنعا كوتەرىلدى. ورتا ديۆيزيوندا قانات يسلام 14-ءشى ورىندى ساقتاپ قالدى, مەيىرىم نۇرسۇلتانوۆ 16-شى ورىنعا تۇراقتادى, جانىبەك ءالىمحان ۇلى 28-ءشى ورىندا. ورتا سالماقتاعى IBO الەم چەمپيونى گەننادي گولوۆكين بولىپ وتىر.
ءبىرىنشى ورتا سالماق دارەجەسىندە ونەر كورسەتەتىن سادريددين احمەدوۆ 30-شى ورىندا (-3), ماديار اشكەەۆ - 68-ءشى ورىندا (-1). جارتىلاي ورتا سالماقتاعى نۇرسۇلتان جاڭاباەۆ 29-شى ورىنعا جايعاستى, دانيار ەلەۋسىنوۆ 39-شى ورىنعا تۇراقتادى, بوبيرجان مومينوۆ 73-ءشى ورىننان 72-ءشى ورىنعا كوتەرىلدى. ءبىرىنشى جارتىلاي ورتا ديۆيزيونداعى باتىر جۇكەمباەۆ ءوز ورنىن 11-دەن 10-عا جاقسارتتى, ال جانقوش تۇراروۆ — 47-ءشى (46-شى ورىندا بولدى) ورىنعا ءتۇسىپ قالدى.
جەڭىل سالماقتاعى ۆيكتور كوتوچيگوۆ 37-ءشى ورىندا (-1), ابىلايحان حۋساينوۆ توپ-100-دەن شىعىپ كەتتى. ەكىنشى جارتىلاي جەڭىل ساناتتاعى ستانيسلاۆ كاليتسكي 66-شى ورىننان 64-ءشى ورىنعا كوتەرىلسە, سۇلتان زاۋىربەك ءتورت ورىنعا جوعارىلاپ, 76-شى ورىندى يەلەندى. جەڭىل ساناتتاعى ەلشات نىعمەتوللا ءۇش پوزيتسياعا جوعارىلادى — 51-ءشى ورىن.