ۇلتتار ليگاسىنىڭ ەكىنشى ماۋسىمى

بىلتىرعى ماۋسىمدا «D» ليگاسىندا ونەر كورسەتكەن قا­زاق­ستان ۇلتتىق قۇراماسى ءتۋرنير­دىڭ جاڭا ەرەجەسى بويىن­شا بيىل «س» ليگاسىندا ويناۋعا مۇم­كىندىك الدى. بىزگە قارسىلاس اتان­عان جوعارىداعى ءۇش قۇراما دا قازاقستاندىق فۋتبول جان­كۇيەر­لەرىنە جاقسى تانىس. سەبەبى ءار جىلدارى قازاقستان قۇرا­ما­سى البانيا, بەلارۋس جانە ليت­ۆا فۋتبولشىلارىمەن جاسىل الاڭدا كەزدەسكەن. ەندى قار­سىلاس­تارىمىزعا جەكە-جەكە توق­تالىپ, مۇمكىندىكتەرىن سارالاپ كورەيىك.

جەرەبەگە سايكەس, قازاقستان ۇلتتار ليگاسىنداعى العاشقى ويى­نىن سىرت الاڭدا بالتىق جاعالاۋىندا ورنالاسقان ليتۆا قۇراماسىمەن وتكىزەدى. ەكى ەلدىڭ فۋتبولشىلارى بۇگىنگە دەيىن ءبىر عانا ماتچ وتكىزگەن. ونىڭ ءوزى – جول­داستىق كەزدەسۋ. 2014 جى­­­لى انتاليادا وتكەن ويىندا ەكى قۇ­راما 1:1 ەسەبىمەن تەڭ تار­قاس­قان. ماتچتىڭ 5-مينۋتىندا گە­­دي­ميناس ۆيچيۋس ەسەپتى اشسا, 69-مينۋتتا نۇربول جۇماسقاليەۆ گول سوعىپ, ۇلتتىق قۇرامانى جە­­ڭىلىستەن قۇتقارىپ قالدى. سون­­داي-اق بۇل ماتچ سول كەزدەگى قا­زاق­ستان قۇراماسىنىڭ باس باپ­كەرى يۋري كراسنوجان ءۇشىن دە العاشقى ويىنى ەدى.

سونداي-اق جەرلەستەرىمىز 2020 جىلعى العاشقى ويىنىن ءدال وسى بولاشاق قارسىلاستارى ليتۆا قۇراماسىنا قارسى جولداستىق كەزدەسۋ وتكىزۋدەن باستايتىنىن ايتا كەتكەن ءجون. ماتچ 27 ناۋرىزدا الما­تىداعى ورتالىق ستاديوندا بولادى. قازىرگى تاڭدا ليت­ۆا قۇراماسى فيفا رەي­تينگىندە 131-ورىندا تۇر. قارىمتا ويىن قاراشادا قازاقستاندا وتەدى.

بەلارۋس پەن قازاق­ستان قۇرا­ماسىنىڭ فۋتبولشىلارى بۇگىنگە دە­يىن جاسىل الاڭدا ءۇش رەت جولىقتى. ونىڭ ەكەۋى رەس­مي ماتچ بولسا, بى­رەۋى – جول­داس­تىق كەزدەسۋ. 2010 جىل­عى الەم چەمپيوناتىنىڭ ىرىك­تەۋ كە­زە­ڭىندە ءبىر توپتا سىنعا تۇس­كەن ەكى قۇرامانىڭ ەڭ العاشقى «تا­نىستىعى» 2009 جىلى باستال­دى. 1 ساۋىردە الماتىداعى ورتا­لىق ستاديوندا وتكەن ويىن­نىڭ ءبىرىنشى تايمىندا جەرلەس­تەرىمىز 1:0 ناتيجەسىمەن ەسەپتە الدا تۇرعان-دى. ەكىنشى تايمدا ءبىزدىڭ فۋتبولشىلاردى نە قىر­سىق شالعانى بەلگىسىز, اينال­دىرعان 16 مينۋتتا 4 گول وتكىزىپ الدى. ماتچ اياقتالار تۇستا قوناق­تار تاعى ءبىر گول سالىپ, 5:1 ەسە­بىمەن جە­ڭىپ كەتتى.

سول جىلى قازان ايىندا بەرست­تە وتكەن قارىمتا كەزدەسۋدە ءبىز­دىڭ فۋتبولشىلار الاڭ يەلە­رىنە ەش قارسىلىق كورسەتە الماي, تاعى دا ءىرى ەسەپپەن جەڭىلدى. بۇل جولى بەلارۋس قۇراماسى ءبىزدىڭ قاقپاعا جاۋاپسىز 4 گول سوقتى. ەكى جەڭىلىستەن كەيىن جەر­لەستەرىمىز تەك 2011 جىلى ان­تاليادا وت­كەن جولداستىق كەزدەسۋدە عا­نا تەڭ وينادى. ماتچتىڭ ما­ڭىزى بولماسا دا, ازىرگە وسى كەزدەسۋدەگى تەڭ ەسەپتى كوڭىلگە مەدەۋ قىلامىز. ويىننىڭ 45-مينۋتىندا ۆياچەسلاۆ گلەب پەنالتيدەن گول سوقسا, 90-مينۋتتا سەرگەي وستاپەنكو ۇلتتىق قۇراماعا تەڭ ناتيجەنى سىيلادى. قورىتىندى ەسەپ – 1:1.

ۇلتتار ليگاسىنداعى ەكى قۇ­­را­­مانىڭ العاشقى ويىنى 7 قىر­كۇيەكتە قازاقستاندا وت­سە, قا­رىمتا ماتچ قازان ايى­نا جوس­پارلانعان. بەلارۋس قۇ­را­­­ماسى فيفا رەيتينگىندە 87-ورىندا تۇر. ۇلتتار ليگاسى­نىڭ 2018/19 ماۋسىمىن­دا بەلا­رۋس فۋتبولشىلارى «D» لي­­گا­سىندا ءب­ى­رىنشى ورىن الىپ, بي­ىلعى ەۋ­رو­پا چەمپيوناتىنا جول­داما بەرەتىن ويىنعا قا­تى­سۋعا مۇمكىندىك الدى.

توپتاعى سوڭعى قارسىلاسىمىز – البانيا قۇراماسى. ازىرگە ەكى ەلدىڭ فۋتبولشىلارى تاريحتا ەكى رەت كەزدەسكەن. قازاقستان مەن البانيا 2006 جىلى گەرمانيادا وتكەن الەم چەمپيوناتىنا ىرىكتەۋ كە­زەڭى اياسىن­دا ءبىر توپقا تۇسكەن. بۇل قازاقستان قۇراما­سىنىڭ 2004 جىلى ۋەفا قۇرامىنا كىرگەننەن كەيىنگى العاشقى حالىق­ارالىق ءتۋر­نيرى ەدى. 2004 جىلدىڭ قازان ايىندا الماتىدا وتكەن ويىندا قوناقتار 1:0 ەسەبىمەن جەڭىسكە جەتتى. 2005 جىلى سىرت الاڭ­داعى كەزدەسۋدە دە جەرلەس­تە­رىمىز قار­سىلاستارىنا جول بەر­دى. بۇل جولعى ماتچ 2:1 ەسە­بىمەن الاڭ يە­لەرىنىڭ پايداسىنا شە­شىل­دى. قازىرگى تاڭدا ال­بانيا فيفا رەيتينگىندە 66-ورىندا تۇر. رەيتينگ بويىنشا توپ­تاعى ەڭ ۇزدىك قۇرامانىڭ ءبىرى. ۇلتتار ليگاسىنداعى ەكى قۇراما ارا­سىن­داعى ءبىرىنشى ماتچ قازان ايىندا قازاقستاندا, قارىمتا ويىن قاراشا ايىندا البانيادا وتپەك.

جالپى ءبىزدىڭ توپتا ءبىرىنشى ورىن ءۇشىن تالاس قازاقستان, ال­­­بانيا جانە بەلارۋس قۇرا­مالارى اراسىندا وربىمەك. سون­داي-اق قا­زاق­ستان – بەلارۋس اراسىنداعى ماتچتا «استانا» سا­­پىن­داعى بە­لارۋستىق يۆان ماەۆسكي مەن ماكس ەبونگتىڭ ءرولى ۇلكەن بول­ماق. ويتكەنى ەكەۋى دە قازاقستان چەمپيوناتىندا وينايدى جانە العاش­قىسى ءبىزدىڭ فۋتبولشىلاردىڭ مۇمكىندىگىن جاقسى بىلەدى. سونىمەن قاتار قازىرگى تاڭدا ۇلتتىق قۇرا­مانىڭ باس باپكەرى ميحال بيلەك «اس­تا­نانى» دا جاتتىقتىراتىنى بەل­گىلى. ايتسە دە بيلەك مىرزا كۇز­گە دەيىن «استانا» ساپىنداعى «تىڭ­شى» فۋتبولشىلارىنا بار تاكتيكاسىن جايىپ سالماي, ءبىر بارماعى بۇ­گۋلى جۇرەتىنى انىق.

بيىلعى ەرەجە بويىنشا, ۇلتتار ليگاسىنىڭ فينالدىق ماتچى تەك «ا» ليگاسىنىڭ جە­ڭىم­­پازدارى اراسىندا عانا وينالادى. وتكەن جىلعى باسەكەدە پورتۋگاليا قۇراماسى ۇلتتار ليگاسىنىڭ تۇڭعىش جەڭىمپازى اتاندى. فينالدا نيدەرلاند قۇراماسىنا قارسى ويناعان پي­رەنەي تۇبەگى ەلىنىڭ فۋتبولشى­لارى 1:0 ەسەبىمەن جەڭىسكە جەت­كەن-ءدى.

2014 جىلى ەلوردادا وتكەن ۋەفا-نىڭ XXXVIII كونگرەسىنەن كەيىن اتالعان ۇيىم فۋتبولدان ەۋروپا چەمپيوناتىنىڭ 60 جىلدىعىن تويلاۋ ماقساتىندا وسىنداي جاڭا تۋرنير ەنگىزدى. ۇلتتار ليگاسىنىڭ ماقساتى – جولداستىق كەزدەسۋلەردى رەسمي ويىندارعا اۋىستىرۋ ارقىلى ۇلتتىق قۇرامالاردىڭ دەڭگەيىن دامىتۋ, سونىمەن قاتار دەڭگەيى تەڭ ۇلتتىق قۇرامالارعا ءبىر-بى­رىمەن ويناۋعا مۇمكىندىك بەرۋ.

ەسكە سالا كەتەيىك, ۇلتتار ليگا­سى­نىڭ العاشقى ماۋسىمى­نا قازاقستان قۇراماسى دا قاتىس­قان بولاتىن. «D» ليگاسىندا گرۋزيا, لاتۆيا جانە اندوررا قۇرا­­مالارىمەن ءبىر توپتا باق سىنا­عان جەرلەستەرىمىز التى ۇپاي جيناپ, ەكىنشى ورىن العان بولاتىن. ال توپ جەڭىمپازى اتان­عان گرۋ­زيا قۇراماسى ناۋرىز ايىنىڭ سو­ڭىندا ەۋرو-2020 تۋر­نيرىنە جولداما بەرەتىن جارىسقا قاتىسۋعا مۇمك­ىندىك الدى.