بۇگىن س.سەيفۋللين اتىنداعى وبلىستىق امبەباپ كىتاپحانادا بالالار جازۋشىسى ريما ابىقاەۆانىڭ بالالارعا ارنالعان كىتاپتارىنىڭ تۇساۋكەسەرى بولىپ, مەكتەپ وقۋشىلارىمەن جىلى جۇزدەسۋ وتكىزىلدى. شاراعا وبلىس اكىمىنىڭ ءبىرىنشى ورىنباسارى لاززات تۇرلاشوۆ قاتىستى. بۇل تۋرالى الماتى وبلىسى اكىمىنىڭ ءباسپاسوز قىزمەتى حابارلادى.
الدىمەن ءسوز العان لاززات تۇرلاشوۆ ەلىمىزدە بالالاردىڭ ءبىلىم الۋى مەن تاربيەسىنە جاسالىپ وتىرعان جاعدايلار, بالالار ادەبيەتىنىڭ ۇرپاق تاربيەسىندەگى ءرولى جايلى قىسقاشا بايانداپ, جازۋشىنىڭ تالدىقورعاندىق بالعىندارمەن كەزدەسۋىنە ساتتىلىك تىلەدى.
ريما ابىقاەۆا تالدىقورعانعا كەلگەندەگى ماقساتىنا قىسقاشا توقتالىپ, ءسوزىن ءوز شىعارمالارىن وقۋمەن جالعاستىرىپ, بالالارعا ەرتەگى وقىپ بەردى. ەرتەگىنىڭ مازمۇنىنا بايلانىستى ارنايى جاسالعان سۋرەتتى بەزەندىرۋلەر تەلەەكراندا قاتار ءجۇرىپ وتىردى. بۇل وقۋشىلار ءۇشىن وتە اسەرلى بولدى. مۇنان كەيىن جازۋشىنىڭ كىتاپتارىن شىعارۋ ءىسىن ۇيىمداستىرۋشى, قر فۋتگولف فەدەراتسياسىنىڭ پرەزيدەنتى سۆەتلانا توققۇلوۆا بالالاردان وقىلعان ەرتەگىلەر تۋرالى پىكىرلەرىن سۇراپ, اڭگىمەگە تارتتى. وقۋشىلارعا قازاق جانە ورىس تىلدەرىندە ءتۇرلى ءتۇستى كوركەم سۋرەتتەرمەن بەزەندىرىلگەن جازۋشىنىڭ كىتاپتارى تاراتىلدى. وقۋشىلار اۆتورعا ءتۇرلى ساۋالدارىن قويىپ, اڭگىمەنى جانداندىرا ءتۇستى.
كەزدەسۋ سوڭىندا ر. ابىقاەۆاعا ل. تۇرلاشوۆ جەتىسۋ ءوڭىرى جايلى كىتاپتى سىيعا تارتسا, جازۋشى ءوز تاراپىنان س.سەيفۋللين اتىنداعى كىتاپحانا قورىنا 50-گە تارتا كىتاپتارىن تارتۋ ەتتى.
اتاپ وتسەك, جازۋشى ريما ابىقاەۆا 2-9 جاستاعى بالالارعا ارناپ 29 ەرتەگى, 70 ولەڭ جازعان. رەسەيدەگى ي.ا.بۋنين اتىنداعى جاراتىلىستانۋ عىلىمدارى اكادەمياسىنىڭ كۇمىس مەدالىنىڭ يەگەرى.