العاش رەت ەلوردامىزدا 2021 جىلعى 19-24 شىلدە ارالىعىندا مەكتەپ وقۋشىلارى اراسىندا گاندبولدان ازيا چەمپيوناتى وتەدى. بۇل تۋرالى ەلوردانىڭ ءباسپاسوز قىزمەتى حابارلادى.
«نۇر-سۇلتان» قالاسى اكىمدىگىنىڭ «استانا كونۆەنشن بيۋرو» جشس قازاقستان مەكتەپ سپورت فەدەراتسياسىمەن بىرگە مەكتەپ وقۋشىلارى اراسىندا گاندبولدان ازيا چەمپيوناتىن وتكىزۋ قۇقىعىنا ارنالعان بيددينگكە (كونكۋرس) قاتىستى. ءوتىنىش حالىقارالىق مەكتەپ سپورت فەدەراتسياسىنا (ISF) جانە ازيا مەكتەپ سپورت فەدەراتسياسىنا (ASSF) جىبەرىلدى. نۇر-سۇلتان قالاسىنان تۇسكەن ءوتىنىشتى قاراۋ ناتيجەسىندە وڭ شەشىم قابىلداندى.
نۇر سۇلتان قالاسىندا ءىس-شارا وتكىزۋ تۋرالى شەشىم قابىلداعان كەزدە قالالىق ءتۋريزمنىڭ دامۋ بولاشاعى, جۇزەگە اسىرىلعان ءساتتى جوبالار مەن ءىس-شارالار تاجىريبەسى, تۇراقتى دامۋ, ەكونوميكا, الەۋمەتتىك سالا جانە ەلوردانىڭ اكىمشىلىك جۇيەسى ەسكەرىلدى.
بۇل ازيا مەكتەپ سپورت فەدەراتسياسىنىڭ قولداۋىمەن قازاقستاندا ۇيىمداستىرىلعان مەكتەپ وقۋشىلارى اراسىنداعى العاشقى حالىقارالىق جارىس.
جارىسقا ازيانىڭ كەم دەگەندە 10 ەلىنەن 200-دەن استام وقۋشى قاتىسادى.
سونداي-اق, چەمپيونات اياسىندا اتقارۋشى كوميتەتتىڭ وتىرىسى مەن ازيا مەكتەپ سپورت فەدەراتسياسىنىڭ 10-شى فورۋمى وتەدى. فورۋمعا ازيانىڭ 20 ەلىنەن 60-تان استام ۇلتتىق مەكتەپ سپورت فەدەراتسياسىنىڭ وكىلدەرى قاتىسادى.
قازاقستاندىق مەكتەپ سپورت فەدەراتسياسى, ءوزىن-ءوزى قارجىلاندىراتىن ۇكىمەتتىك ەمەس ۇيىم - حالىقارالىق مەكتەپ سپورت فەدەراتسياسى (ISF) جانە ازيا مەكتەپ سپورت فەدەراتسياسىنىڭ (ASSF) تولىققاندى مۇشەسى. ISF جانە ASSF اياسىندا بۇكىلالەمدىك گيمنازيادالار, جەكپە-جەك سايىستارى, ينكليۋزيۆتىك جانە تانىمدىق ويىندار, 40-تان استام سپورت تۇرلەرى بويىنشا الەم جانە قۇرلىقتىق مەكتەپ چەمپيوناتتارى وتكىزىلەدى.