28 ناۋرىزدا كانادانىڭ كۆەبەك قالاسىندا وتەتىن جارىستا قازاقتىڭ كاسىپقوي بوكسشىسى جانىبەك ءالىمحان ۇلى امەريكالىق دميتريۋس باللاردپەن قولعاپ تۇيىستىرۋگە ءتيىس ەدى.
الايدا اقش بوكسشىسى بەلگىسىز ءبىر سەبەپتەرمەن شارشى الاڭعا شىعۋدان باس تارتتى. ەندى قانداسىمىزدىڭ بۇل كۇندەرى لاس-ۆەگاستا تۇرىپ جاتقان 30 جاستاعى گانالىق يسسا ساميرمەن كۇش سىناساتىن بولدى. ءوز جەكپە-جەكتەرىنىڭ بارلىعىن ول ءوز وتانىندا وتكىزگەن ەكەن. كاسىپقوي رينگكە 18 مارتە كوتەرىلگەن قارا قۇرلىق وكىلى ءالى دە جەڭىلىستىڭ كەرمەك ءدامىن تاتقان ەمەس. سامير 15 كەزدەسۋدە قارسىلاستارىن ەسىنەن تاندىرىپ, تاعى ۇشەۋىندە ۇپاي سانىمەن باسىم ءتۇستى. بۇل 10 راۋندتىق باسەكە بولماق.
ال سول كۆەبەكتەگى بوكس كەشىنىڭ باستى جەكپە-جەگىندە رەسەيلىك ارتۋر بەتەربيەۆ پەن قىتايلىق فانلۋن مەن ايقاسادى. بۇل باسەكەدە جارتىلاي اۋىر سالماق دارەجەسى بويىنشا WBC پەن IBF نۇسقالارىنىڭ چەمپيوندىق بەلبەۋى ساراپقا سالىنادى.