ەلىمىزدە بيىل جەرگىلىكتى جول جەلىسىن دامىتۋعا 262 ملرد تەڭگە قاراستىرىلعان. بۇل قاراجات اۆتوموبيل جولدارىنىڭ 4,3 مىڭ شاقىرىمىن جوندەۋ جۇمىستارىنا جۇمسالماق. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
رەسپۋبليكالىق ماڭىزعا يە جولداردىڭ جاعدايىن جاقسارتۋمەن قاتار, يندۋستريا جانە ينفراقۇرىلىمدىق دامۋ مينيسترلىگى جەرگىلىكتى اتقارۋشى ورگاندار – اكىمدىكتەرگە دە قولداۋ كورسەتەدى.
وبلىستىق جانە اۋداندىق ماڭىزى بار اۆتوجولداردى دامىتۋعا 2020 جىلى 208 ملرد تەڭگە باعىتتالسا, ونىڭ 115 ملرد تەڭگەسى رەسپۋبليكالىق بيۋدجەتتەن, 93 ملرد تەڭگەسى جەرگىلىكتى بيۋدجەتتەن بولىنبەك.
نۇر-سۇلتان, الماتى جانە شىمكەنت قالالارىنىڭ كوشە جەلىسىن دامىتۋعا 50,2 ملرد تەڭگە بولىنسە, 4,1 ملرد تەڭگەگە ەلوردا مەن الماتى قالاسى ماڭىنداعى جەر تەلىمدەرى ساتىلىپ الىنادى.
جالپىلاي العاندا, 350 جوبا ىسكە اسىرىلماق. وسىلايشا, جىل قورىتىندىسى بويىنشا جەرگىلىكتى جول جەلىسىنىڭ ساپاسىن 75% دەيىن جەتكىزۋ جوسپارلانعان. وتكەن جىلى بۇل كورسەتكىش 71% قۇراعان ەدى.
2019 جىلى جوندەۋ جۇمىستارىمەن قامتىلعان جەرگىلىكتى جولداردىڭ جالپى ۇزىندىعى 4 617 شاقىرىمدى قۇرادى. 386 جوبا ىسكە اسىرىلدى. جالپى جەرگىلىكتى جول جەلىسىن دامىتۋعا 260,7 ملرد تەڭگە, سونىڭ ىشىندە وبلىستىق جانە اۋداندىق ماڭىزعا يە جولداردى دامىتۋعا 203 ملرد تەڭگە, نۇر-سۇلتان, الماتى جانە شىمكەنت قالالارىنىڭ كوشە جەلىسىن دامىتۋعا 57,7 ملرد تەڭگە بولىنگەن بولاتىن.
ەسكە سالا كەتەيىك, قازاقستانداعى وبلىستىق جانە اۋداندىق ماڭىزى بار جولداردىڭ جالپى ۇزىندىعى 70,9 مىڭ شاقىرىمدى قۇرايدى. جوندەۋ جۇمىستارى جوسپارعا سايكەس قارقىنمەن جۇزەگە اسىرىلعان جاعدايدا جاقسى جانە قاناعاتتاندىرارلىق جاعدايداعى جەرگىلىكتى جولدار جەلىسىنىڭ ۇلەسى 2025 جىلعا قاراي 95% دەيىن جەتكىزىلەدى.