مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ەنگىزىلگەنىنە ەكى ايعا جۋىقتادى. بۇگىندە اتالعان جۇيە تولىققاندى جۇمىس ىستەپ كەلەدى. ال جامبىل وبلىسى رەفورمانىڭ العاشقى ايىندا قانداي ناتيجەلەرگە قول جەتكىزدى؟ بۇل جونىندە وڭىرلىك كوممۋنيكاتسيالار قىزمەتىنىڭ الاڭىندا وتكەن بريفينگتە ايتىلدى.
«قازىرگى تاڭدا قازاقستان حالقىنىڭ 90 پايىزدان استامى, جامبىل تۇرعىندارىنىڭ 75,8 پايىزدان استامى ساقتاندىرىلعان بولىپ ەسەپتەلەدى. سونىڭ ىشىندە, 659,4 مىڭنان استام تۇرعىن, ياعني وبلىس تۇرعىندارىنىڭ جارتىسىنان كوبى اۆتوماتتى تۇردە مەملەكەت تاراپىنان ساقتاندىرىلىپ وتىر», دەدى «الەۋمەتتىك مەديتسينالىق ساقتاندىرۋ كورى» كوممەرتسيالىق ەمەس اكتسيونەرلىك قوعامى جامبىل وبلىسى بويىنشا فيليالى ديرەكتورىنىڭ ورىنباسارى عايني ايماعانبەتوۆا.
سونىمەن قاتار, مىندەتتى الەۋمەتتىك مەديتسينالىق ساقتاندىرۋ جۇيەسى ىسكە قوسىلعان العاشقى ايدا ەلىمىز بويىنشا حالىققا كورسەتىلگەن كونسۋلتاتيۆتىك-دياگنوستيكالىق قىزمەت سانى وتكەن جىلدىڭ قاڭتارىمەن سالىستىرعاندا 27 پايىزعا ارتقان. سونداي-اق, مىندەتتى الەۋمەتتىك مەديتسينالىق ساقتاندىرۋدى ەنگىزۋمەن سايكەس, مەديتسينالىق كومەك اۋقىمى 135 پايىزعا ۇلعايعان. اعىمداعى جىلى جامبىل وبلىسى بويىنشا دەنساۋلىق ساقتاۋ جۇيەسىنىڭ بيۋدجەتى 70 ميلليون 713 مىڭ 116 تەڭگەنى قۇراپ وتىر. «اتاپ ايتقاندا, كەڭەس بەرۋ دياگنوستيكالىق كومەك ءتۇرى 574 پايىزعا, ونىڭ ىشىندە مەكتەپ مەديتسيناسى 240,3 پايىزعا, ستاتسيوناردى الماستىراتىن كومەك 183 پايىزعا, قالپىنا كەلتىرۋ ەمى جانە مەديتسينالىق وڭالتۋ 462 پايىزعا, پاللياتيۆتىك كومەك جانە مەيىربيكە كۇتىمى 144 پايىزعا ارتقان», دەدى عايني ايماعانبەتوۆا.
جامبىل وبلىسى