قازاقستان رەسپۋبليكاسى ىشكى ىستەر مينيسترلىگى مامانداندىرىلعان كۇزەت قىزمەتى قۇرىلىمدارىنىڭ اراسىندا وسىمەن ەكىنشى رەت «كۇزەت بارىسى» ءتۋرنيرى ۇيىمداستىرىلدى. تۋرنيرگە ەلىمىزدىڭ بارلىق وبلىستارى مەن ءۇش قالاسىنان 120 بالۋان كەلىپ, باپ پەن باق سىناستى.
بوز كىلەمنىڭ ۇستىندە بەلدەسكەن بالۋاندار مامانداندىرىلعان كۇزەت قىزمەتى قۇرىلىمدارىندا كىلەڭ سايدىڭ تاسىنداي اپتال ازاماتتاردىڭ قىزمەت ەتەتىندىكتەرىن كورسەتىپ باقتى. ءسوز اراسىندا تۋرنيرگە قاتىسۋشىلاردى اقمولا وبلىسىنداعى ارىپتەستەرى جاقسىلاپ قارسى الىپ, جارىستى ءساتتى ۇيىمداستىرعاندىعىن ايتا كەتۋگە بولادى. وبلىستىق كۇزەت باسقارماسىنىڭ باستىعى دانيا قايىپوۆتىڭ ايتۋىنا قاراعاندا, بيىلعى دودالى جارىس ۇلى وتان سوعىسىنىڭ 75 جىلدىعىنا ارنالىپ وتىر. باسشىنىڭ ايتۋىنا قاراعاندا, بۇل سالادا دا قازاق كۇرەسىمەن اينالىساتىندار سوڭعى جىلدارى ءبىرشاما كوبەيە تۇسكەن.
كۇزەت بارىسى ءتۋرنيرىنىڭ جەڭىمپازدارى مەن جۇلدەگەرلەرى انىقتالدى. 5 بالۋان ۇزدىك اتالىم يەگەرلەرى اتاندى. كوماندالىق ەسەپتە شىعىس قازاقستان وبلىسى ءبىرىنشى, قىزىلوردالىق ساقشىلار ەكىنشى, جامبىل وبلىسىنىڭ جىگىتتەرى ءۇشىنشى ورىنعا يە بولدى.
اقمولا وبلىسى