جامبىل وبلىسىنىڭ قورداي اۋدانىندا «اتامەكەن» قولداۋ ورتالىعى» اشىلدى. اتالعان جوبا «اتامەكەن» ۇلتتىق كاسىپكەرلەر پالاتاسى مەن ەلىمىزدىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ بىرلەسۋىمەن ىسكە اسىرىلۋدا.
«اتامەكەن» قولداۋ ورتالىعى» جوباسى ءدال وسى اۋداندا كەزدەيسوق ىسكە قوسىلعان جوق. قورداي اۋدانىندا بولعان سوڭعى وقيعالاردان كەيىن ورتالىق حالىق اراسىنداعى الەۋمەتتىك شيەلەنىستى جەڭىلدەتىپ, جۇمىسسىزدىق پەن كاسىپكەرلىك قىزمەتكە جۇمىلدىرۋ ماسەلەلەرىن ايتارلىقتاي شەشۋگە كومەكتەسۋى كەرەك», – دەدى «اتامەكەن» ۇكپ باسقارما توراعاسىنىڭ ورىنباسارى ەلدار جۇماعازيەۆ ورتالىقتىڭ اشىلۋ راسىمىندە. قورداي اۋدانىندا جۇمىسپەن قامتۋدىڭ ءموبيلدى ورتالىقتارى – «مادەنيەت ءۇيى» جانە «قاراكەمەر» اۋىلىندا ورنالاسقان.
«مۇنداي ورتالىقتار كەشەندى شارالاردى كورسەتەدى. باستىسى, قولجەتىمدىلىك, اقپاراتتىلىق جانە جاۋاپكەرشىلىك. «اتامەكەن» قولداۋ ورتالىعى» جۇمىسپەن قامتۋدىڭ ءموبيلدى ورتالىعىندا بۇگىنگى تاڭدا قورداي اۋدانىندا جۇرگىزىلگەن ساۋالناما نەگىزىندە بوس جۇمىس ورىندارىنىڭ بازاسى قالىپتاستىرىلعان. بۇل 7 859 كاسىپكەرلىك سۋبەكتىسى. جۇمىسسىز ادامداردىڭ ورتالىققا ءوتىنىم جاساۋىن دا كەڭەسشىلەر بازامەن قاراپ, ولارعا جۇمىس ورىندارىن ۇسىنادى», – دەدى جامبىل وبلىسى وڭىرلىك كاسىپكەرلەر پالاتاسىنىڭ ديرەكتورى ولجاس قارجاۋوۆ.
سونىمەن قاتار, ولجاس قارجاۋوۆ «اتامەكەن» قولداۋ ورتالىعى» جۇمىسپەن قامتۋدىڭ ءموبيلدى ورتالىعىن اشپاس بۇرىن قورداي اۋدانىندا 4 مىڭعا جۋىق كومپانيا ساۋالناماعا قاتىسقانىن, ولار 111 بوس جۇمىس ورنى تۋرالى حابارلاعانانى ايتتى. «كومپانيالارعا ساتۋشىلار, باقتاشىلار, جۇرگىزۋشىلەر, ساتۋ جونىندەگى مەنەدجەرلەر, تىگىنشىلەر, تراكتوريست-مەحانيزاتورلار, جۇمىسشىلار, ساۋىنشىلار, جانارماي قۇيۋ ستانتسيالارىنىڭ وپەراتورلارى قاجەت. ورتاشا ايلىق ەڭبەكاقى 42 000-90 000 تەڭگەنى قۇرايدى. ايتا كەتەيىك, 2 كۇن ىشىندە «اتامەكەن» قولداۋ ورتالىعى» 90 ادامعا قىزمەت كورسەتتى», – دەدى ولجاس قارجاۋوۆ.
جوبانىڭ تاعى ءبىر ەرەكشەلىگى جۇمىس ىستەۋ فورماتىندا. ءار ورتالىقتا 3 مەنەدجەر جانە 1 جەكە قابىلەتتى دامىتۋ كەڭەسشىسى قىزمەت كورسەتەدى. جەكە قابىلەتتى دامىتۋ كەڭەسشىسى اناعۇرلىم لايىقتى ماماندىقتى انىقتاۋ ماقساتىندا تەستىلەۋ وتكىزەدى, قانداي داعدىلاردى دامىتۋ قاجەتتىگىن ايتادى. وسى رەتتە «اتامەكەن» قولداۋ ورتالىعىنىڭ» كومانداسى ادامداردى قابىلداپ قانا قويماي, سونداي-اق, تۇراقتى تۇردە حالىققا جاقىن بولىپ, اۋىلداردى ارالاپ, ءۇيدى-ۇيگە بارىپ, تۇرعىندارعا جۇمىسپەن قامتۋدا قولداۋ شارالارى تۋرالى اقپارات بەرەتىن بولادى.
سونىمەن قاتار, ءوتىنىم بەرگەندەر «ەڭبەك» جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى شەڭبەرىندە قىسقا وقىتۋ كۋرستارىنا قاتىسا الادى. وقىتۋ كاسىپورىن بازاسىندا وتەدى. مۇنداي وقىتۋ 1 ايدان 3 ايعا دەيىن جالعاسادى, شاكىرتاقى جانە ارى قاراي جۇمىسپەن قامتۋ قاراستىرىلعان. بۇدان بولەك, اتالعان باعدارلامانىڭ ەكىنشى باعىتى شەڭبەرىندە «باستاۋ» جوباسى بويىنشا ءوتىنىم بەرگەن جۇمىسسىزدار جانە ءوزىن-ءوزى جۇمىسپەن قامتىعاندار جاس ەرەكشەلىگىنە قاراماستان ءبىر اي بويى كاسىپكەرلىك نەگىزدەرىنە وقىپ, بيزنەس جۇرگىزۋدە نەگىزگى داعدىلاردى يگەرەدى. ارى قاراي جوبا تۇلەكتەرى كاسىپ اشۋعا ميكروقارجىلاندىرۋ جانە نەمەسە 200 ايلىق ەسەپتىك كورسەتكىش كولەمىندە گرانت الا الادى. «باستاۋ» جوباسى شەڭبەرىندە بىلتىر قورداي اۋدانى بويىنشا 403 تىڭداۋشى وقىپ, سونىڭ ىشىندە 155 جوبا گرانت العان.
«بۇل جوبا ەل پرەزيدەنتى قاسىم-جومارت توقاەۆتىڭ 300 مىڭنان استام جۇمىسسىز جانە ءوزىن-ءوزى جۇمىسپەن قامتىعانداردى جۇمىسپەن قامتۋعا جاردەمدەسۋ شارالارىن قولعا الۋ جونىندەگى تاپسىرماسى. سونداي-اق, جۇمىسپەن قامتۋدىڭ بارلىق شارالارىن پرواكتيۆتى رەجيمگە اۋىستىرۋ اياسىندا ىسكە اسىرىلۋدا. بۇگىندە «اتامەكەن» قولداۋ ورتالىعى» قورداي اۋدانىنان بولەك نۇر-سۇلتان, الماتى جانە شىمكەنت قالالارىندا اشىلعان. 2019 جىلى جۇمىسپەن قامتۋدىڭ ءموبيلدى ورتالىقتارى شەڭبەرىندە 81 109 ادامعا كەڭەس بەرىلدى, 8787 ادام «باستاۋ» جوباسىمەن وقۋعا جىبەرىلدى, 2834 ادام «جاس كاسىپكەر» جوباسىمەن وقىدى. «اتامەكەن» قولداۋ ورتالىعى» جوباسى ارقىلى 2403 ادام جۇمىسقا تۇردى. وسى وڭ تاجىريبە جوبانى قازاقستاننىڭ باسقا وڭىرلەرىندە دە جالعاستىرۋعا نەگىز بەرىپ وتىر», – دەدى «اتامەكەن» ۇكپ جۇمىسپەن قامتۋ ماسەلەلەرى جونىندەگى دەپارتامەنت ديرەكتورى ايدانا توعىزباەۆا
جامبىل وبلىسى