الماتى قالالىق ءماسليحاتىنىڭ دەپۋتاتى كونستانتين اۆەرشين جەتەكشىلىك ەتەتىن «مەن – الماتىلىقپىن» قوعامدىق بىرلەستىگى ءوز جۇمىسىن 2014 جىلى باستاعان ەدى. سول كەزدەن بەرى ءبىراز شارۋا اتقارىپ, كوپتەگەن يگى ءىستىڭ باسى-قاسىنان تابىلعان ەرىكتىلەر حالىقتىڭ زور العىسى مەن ىستىق ىقىلاسىنا بولەنۋدە.
بۇگىنگى تاڭدا «مەن – الماتىلىقپىن» قوعامدىق بىرلەستىگى سەگىز باعىتتا جۇمىس ىستەۋدە: ءبىلىم بەرۋ, توتەنشە جاعدايلاردىڭ سالدارىن جويۋ جانە زارداپ شەككەن ايماقتارعا گۋممانيتارلىق كومەك كورسەتۋ, سپورتتىق ليگا مەن سالاماتتى ءومىر سالتى, دەمورگانيزاتسيا جۇمىستارى, «يۋستۋس» زاڭ پالاتاسى, ارنايى ماقساتتاعى كۇشتەردىڭ ارداگەرلەر وداعىمەن بىرلەسكەن جۇمىس, ەكولوگيا, جاستار ماسەلەسى.
راسىندا دا, وسى باعىتتاردا ايتۋلى ۇيىم ءبىراز شارۋا تىندىرعان ەكەن. ماسەلەن, رەسپۋبليكامىزدىڭ بىرقاتار وڭىرىندە (ارىس پەن الماتى قالالارى, قاراعاندى مەن اقتوبە وبلىستارى جانە ت.ب), تىپتەن شەت مەملەكەتتەردە بولعان توتەنشە جاعدايلاردىڭ سالدارىن جويۋعا اتسالىسىپ, گۋمانيتارلىق كومەك كورسەتتى. قارتتار مەن جەتىمدەر ءۇيىن ءوز قامقورلىعىنا الدى. كەمباعال جاندار مەن تۇرمىسى تومەن وتباسىلارعا كومەك كورسەتتى.
ءبىلىم بەرۋ جوباسى بويىنشا نۇر-سۇلتان مەن الماتى قالالارىندا 1700-دەن اسا بالانى جاڭا تەحنولوگيالار بويىنشا اعىلشىن تىلىنە ۇيرەتتى. سپورتتىق سايىستار مەن اسكەري-پاتريوتتىق شارالاردى ۇزدىكسىز ۇيىمداستىرىپ تۇرادى. وسىلايشا, حالىقتىڭ دەنساۋلىعىن نىعايتىپ, ولاردى سالاماتتى ءومىر سالتىنا ىنتالاندىرۋعا جانە جاس جەتكىنشەكتەردى وتانسۇيگىشتىك رۋحتا تاربيەلەۋگە بارىنشا ۇلەس قوسۋدا.
ەكولوگيا ماسەلەسى دە «مەن – الماتىلىقپىن» قوعامدىق بىرلەستىگى نازارىنان تىس قالعان ەمەس. وسى ورايدا ۆولونتەرلەر قالانى كورىكتەندىرۋ, گۇلدەندىرۋ باعىتىندا ۇزدىكسىز جۇمىس جۇرگىزىپ كەلەدى. مىنە, وسىلاي تىزبەكتەي بەرسەك, ايتۋلى ۇيىم تاراپىنان اتقارىلىپ جاتقان شارۋانىڭ از ەمەستىگىنە انىق كوز جەتكىزۋگە بولادى.
الماتى