ەلوردادا مۇمكىندىگى شەكتەۋلى جانداردى قوعامعا بەيىمدەۋگە باعىتتالعان تەحنولوگيالىق شەشىمدەر جوباسى باستالدى.
جوبا قاتىسۋشىلارى مۇمكىندىگى شەكتەۋلى جانداردى قوعامعا بەيىمدەۋگە جانە ولاردىڭ تولىققاندى ءومىرىن ۇيىمداستىرۋعا باعىتتالعان يننوۆاتسيالىق شەشىمدەر ۇسىنادى. «TOM: Nur-Sultan» دەگەن اتپەن باستاۋ العان مەيكاتون 3 كەزەڭدە جۇزەگە اسىرىلادى. مەيكاتون فورماتىندا ونەرتاپقىشتار 72 ساعات ىشىندە ءوز ۇلگىلەرىن ۇسىنۋلارى قاجەت.
نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ باسشىسى داۋلەت كارىبەك كرەاتيۆتى ءارى دارىندى جاس ونەرتاپقىشتار مەن مۇمكىندىگى شەكتەۋلى جانداردىڭ باسىن قوساتىن بۇل الاڭدا مۇگەدەكتەردىڭ كۇندەلىكتى تۇرمىسىندا كەزدەسەتىن كەدەرگىلەردى جەڭۋگە باعىتتالعان تىڭ تەحنولوگيالىق شەشىمدەر ۇسىنىلاتىنىنا سەنىمدى.
قازاقستان مۇگەدەكتەر كونفەدەراتسياسىنىڭ اتقارۋشى ديرەكتورىنىڭ ورىنباسارى الەكساندر حوركين جوباعا قاتىسۋ ارقىلى توبىمەن بىرگە ءوزى سياقتى ەرەكشە قاجەتتىلىگى بار جانداردىڭ ءومىرىن جەڭىلدەتۋدى كوزدەيدى.
«مارافوندا ءتۇرلى سالا ماماندارىنان قۇرالعان ەرەكشە توبىمىز بار, جوباعا قاتىسۋ ءوز مۇمكىندىگىمىزدى كورسەتۋ عانا ەمەس, الەۋمەتتىك كاسىپكەرلىكتە ءوزىمىزدى سىناپ كورۋ بولىپ وتىر. وسىنداي مۇمكىندىك ءۇشىن ۇيىمداستىرۋشىلارعا العىس ايتا وتىرىپ, ءوزىم سەكىلدى جانداردىڭ جاڭا قىرىن تانىتۋعا باعىتتالعان جوبالار كوپ بولسا ەكەن دەيمىن»,- دەدى ا. حوركين.
ۇيىمداستىرۋشىلاردىڭ ءبىرى تەل-اۆيۆ ۋنيۆەرسيتەتىنىڭ دوستار قاۋىمداستىعىنىڭ ۆيتسە-پرەزيدەنتى سانيا اراپوۆا بيىلعى مەيكاتوننىڭ باستى ەرەكشەلىگى جاڭا كەزىڭنىڭ قوسىلۋىندا دەيدى.
جاڭا كەزەڭدە جوعارى وقۋ ورىندارى مەن كوللەدجدەر جوبالارىن اۋىزشا تانىستىرا الادى. بۇل ەلورداداعى وقۋ ورىندارىنىڭ ستۋدەنتتەرىن جوباعا قاتىسۋعا شاقىرۋعا مۇمكىندىك بەرمەك. وسىلايشا ۇيىمداستىرۋشىلار مەيلىنشە كوپ جاستى يگى باستاماعا جۇمىلدىرۋدى كوزدەيدى.
شارا نازارباەۆ ۋنيۆەرسيتەتىنىڭ يننوۆاتسيالىق كلاستەرىنىڭ Fab Lab زەرتحاناسىنىڭ الاڭىندا وتەدى.
قاتىسام دەۋشىلەر 2 ناۋرىز - 1 ءساۋىر ارالىعىندا تىركەلە الادى. جوباعا جەكە نەمەسە توپپەن قاتىسۋعا بولادى.
Ideathon كەزەڭى وسى جىلدىڭ 11-13 ناۋرىز كۇندەرى وتپەك. ال 15 ءساۋىر كۇنى ونەرتاپقىشتار مۇمكىندىگى شەكتەۋلى جاندارمەن كەزدەسىپ, پروتوتيپتەردى دايىنداۋعا كىرىسەدى. سوڭعى كەزەڭدە 15-18 مامىر كۇندەرى 72 ساعات ىشىندە قازىلار القاسىنا دايىن جوبالار تانىستىرىلادى.
وتكەن جىلى نۇر-سۇلتان قالاسى اكىمدىگىنىڭ قولداۋىمەن 7 كوماندا قاتىسقان مەيكاتون وتكەن ەدى. ءساتتى شىققان ەكى پروتوتيپ پايدالانۋعا بەرىلدى.
جوبا مۇگەدەك جانداردىڭ ماسەلەسىن شەشىپ قانا قويماي, الەۋمەتتىك كاسىپكەرلى دامىتۋدى ماقسات ەتكەن.