ۇلى ابايدىڭ 175 جىلدىق مەرەيتويىنا ارنالعان «اراي – 2020» بايقاۋىنىڭ ىرىكتەۋ كەزەڭىنە 294 ۇمىتكەر قاتىسقان بولاتىن. ال كۇنى كەشە سولاردىڭ اقتىق سىنعا جولداما العان 38-ءى باق سىنادى. تۇركىستان قالاسىنداعى ر.سەيتمەتوۆ اتىنداعى مۋزىكالىق-دراما تەاترىندا وتكەن جاس ەسترادا انشىلەرى مەن مادەني ءىس-شارا جۇرگىزۋشىلەر بايقاۋىن وبلىستىق مادەنيەت باسقارماسى ۇيىمداستىرىپ وتىر.
ابايدىڭ شىعارمالارىن جاستار اراسىندا كەڭىنەن ناسيحاتتاپ, جاس تالانت يەلەرىنىڭ ونەرىنە قولداۋ ءبىلدىرۋدى ماقسات ەتكەن بايقاۋ 25 جىلدان بەرى ءداستۇرلى تۇردە وتكىزىلىپ كەلەدى. بۇل جولى قازىلىق ەتۋگە حالىقارالىق جانە رەسپۋبليكالىق تەاتر فەستيۆالدەرىنىڭ جۇلدەگەرى, مەملەكەتتىك «دارىن» سىيلىعىنىڭ يەگەرى, استانا جاستار تەاترىنىڭ اكتەرى ءادىل احمەتوۆ پەن وبلىستىق «اراي» جاس ءان ورىنداۋشىلار بايقاۋىنىڭ 1996 جىلعى گران-پري يەگەرى, حالىقارالىق «ازيا داۋىسى» فەستيۆالىنىڭ جەڭىمپازى, ءانشى باۋىرجان يساەۆ شاقىرىلىپتى. اباي اندەرىمەن قاتار حالىق كومپوزيتورلارىنىڭ دا شىعارمالارى ورىندالعان بايقاۋدىڭ اشىلۋ سالتاناتىندا وبلىستىق مادەنيەت باسقارماسى باسشىسىنىڭ مىندەتىن اتقارۋشى اسىلحان تەمىرحان ونەر دوداسى سوڭعى ءتورت جىلدان بەرى ەكى جىلدا ءبىر رەت وتكىزىلىپ جۇرگەنىن ايتىپ ءوتتى. وبلىستاعى يميدجدىك كونكۋرس بولعاندىقتان, مۇندا توپ جارعاندار رەسپۋبليكالىق بايقاۋدا باق سىنايدى.
سونىمەن ءان بايقاۋىنىڭ باس جۇلدەسىنە اپلاتون راقىمجان لايىق دەپ تانىلسا, «التىن جۇلدىز» دۋەتى جۇلدەلى ءبىرىنشى ورىندى يەلەندى. ال جاينا ءاپساتتار ەكىنشى ورىنعا, ارداق ىسقاقوۆا مەن ساتداۋلەت سۇلەيمەنوۆ ءۇشىنشى ورىنعا لايىقتى دەپ تانىلدى. مادەني ءىس-شارا جۇرگىزۋشىلەر سايىسىندا باس جۇلدەنى ينابات ابىتحانقىزى جەڭىپ الدى, ال ءبىرىنشى ورىنعا نۇ-رايىم تولەبەك, ەكىنشى ورىنعا جاسمينا اناربەك لايىق دەپ تانىلدى. داستان ءالجانوۆ پەن نۇركەن ابدراحمان ءۇشىنشى ورىندى يەلەندى.
بۇدان بولەك, وبلىستىق مادەنيەت باسقارماسىنىڭ ارنايى جۇلدەلەرى دە ءوز يەلەرىنە تابىس ەتىلدى. ونەر دوداسىنىڭ سوڭى گالا-كونتسەرتكە ۇلاستى.
تۇركىستان وبلىسى