ايگىلى ءانشى-كومپوزيتور ەستاي بەركىمباي ۇلىنىڭ ەسكى سۋرەتى تابىلدى. جادىگەر رەسەيدىڭ ورتالىق مەملەكەتتىك قازىرگى زامان تاريحى مۇراجايىنىڭ قورىندا ساقتالعان ەكەن.
سۋرەتكە «حالىق كومپوزيتورى ەستاي بەركىمباي ۇلىنىڭ پاۆلودارداعى اباي اتىنداعى ورتا مەكتەپتىڭ وقۋشىلارىمەن جانە ۇستازدارىمەن كەزدەسۋى» دەپ انىقتاما بەرىلگەن. سۋرەت 1940 جىلى پاۆلودار قالاسىندا ءتۇسىرىلىپتى.
ءبىر توپ ادامنىڭ ورتاسىندا وتىرعان وتكىر كوزدى, تىماق پەن شاپان كيگەن ءانشى ەستاي. ءانشىنىڭ وسى كيىممەن تۇسكەن باسقا دا فوتولارى بار. ماسەلەن, ولكەتانۋشى, جۋرناليست ايتجان بادەلحان قۇراستىرعان «ەستاي» اتتى جيناقتا ءانشى-سازگەردىڭ ءدال وسى تىماق پەن شاپاندى كيىپ تۇسكەن سۋرەتى ۇسىنىلعان. وعان «قىرقىنشى جىلدارى پاۆلودار قالاسىندا تۇسىرىلگەن» دەپ انىقتاما بەرىلىپتى. بىزدىڭشە, رەسەي مۇراجايىنان تابىلعان جانە «ەستاي» جيناعىندا ۇسىنىلعان ەكى فوتو دا ءبىر ۋاقىتتا, ءبىر جەردە تۇسىرىلگەن بولۋى ابدەن مۇمكىن.
جالپى, قولىمىزدا ەستاي بەركىمباي ۇلىنىڭ بەس-التى عانا فوتوسى بار. سوندىقتان رەسەي مۇراجايىنان تابىلعان بۇل سۋرەت ءبىز ءۇشىن قۇندى جادىگەر ەكەنى داۋسىز.
ايتپاقشى, «قازاق تاريحىنا قاتىستى سۋرەتتەردى تاۋىپ الۋعا بولادى» دەپ رەسەيدىڭ ورتالىق مەملەكەتتىك قازىرگى زامان تاريحى مۇراجايىنىڭ ەلەكتروندى مەكەنجايىن ۇسىنعان جۋرناليست سەرىكبول حاسان ەكەنىن اتاپ وتكەن ءجون. مۇراجايدىڭ ەلەكتروندى قورىندا (goskatalog.ru) ءبىزدىڭ ەل مەن جەردىڭ تاريحىنا قاتىستى كوپ دەرەك بار.
فارحات امىرەنوۆ,
جۋرناليست