«مەركى قانت زاۋىتى» كاسىپورنى شارۋالاردىڭ قارىزىن وتەيدى

ء«بىز كاسىپورىن باسشىلىعىمەن كەزدەستىك. قىزىلشا وسىرۋشىلەر الدىنداعى بەرەشەكتى كەستە بويىنشا وتەۋگە كەلىسىم جۇرگىزدىك. ولار كەلىستى. ەگەر زاۋىت باسشىلىعى ءوز ۋادەسىن ورىنداماسا, قاتاڭ شارالار قولداناتىن بولامىز. اگرونومدار قايتا ءتاتتى ءتۇبىر ەگۋ جۇمىستارىن جۇرگىزۋ ءۇشىن بەرەشەك قاراجاتىنىڭ ءبىر بولىگى كەلەسى ايدا قايتارىلادى دەپ جوسپارلانۋدا», دەدى بەردىبەك ساپارباەۆ. ال, «مەركى قانت زاۋىتى» كاسىپورنى باقىلاۋ كەڭەسىنىڭ توراعاسى نۇرجان قايىربەكوۆ فەرمەرلەر الدىنداعى قارىزداردىڭ تولىعىمەن وتەلەتىنىن جەتكىزدى.

«قازاقستاندا قانت باعاسىنىڭ كۇرت تومەندەۋىنە بايلانىستى بىزدە دە كۇردەلى قارجىلىق جاعداي قالىپتاسىپ, وبلىس ديقاندارى الدىندا قارىز بولىپ قالدىق. وبلىس اكىمىمەن كەزدەسۋدە بەرەشەكتى كەزەڭ-كەزەڭىمەن وتەۋ جونىندە شەشىم قابىلداندى. قارىزدىڭ ءبىرىنشى جارتىسى كەلەسى ايدا وتەلەتىن بولادى, قالعانى ءساۋىر ايىنىڭ العاشقى ەكى اپتاسىندا تولەنەدى», دەدى ول.

زاۋىت باسشىلىعىنىڭ ايتۋىنشا, ءتاتتى ءتۇبىر ەگۋشىلەردىڭ الدىنداعى جالپى قارىز 918 ميلليون تەڭگەنى قۇرايدى. بۇل رەتتە اۋىل شارۋاشىلىعى تاۋارلارىن وندىرۋشىلەر وزەكتى ماسەلەلەرىنىڭ جەدەل شەشىلۋىنە ىقپال ەتكەنى ءۇشىن اكىمگە العىس ءبىلدىردى. «بۇگىندە ءبىزدىڭ ورتاق ۇلكەن ماسەلەمىز – قانت زاۋىتى تاراپىنان قارىزداردىڭ تولەنبەۋى. 

وبلىس باسشىسى ءبىزدىڭ ماسەلەنى شەشىپ بەردى. ءوڭىردىڭ قىزىلشا وسىرەتىن ديقاندارى بۇل شەشىمگە ريزامىز. الداعى ۋاقىتتا قانت قىزىلشاسى سالاسىن دامىتۋدى, كەڭەيتۋدى جالعاستىراتىن بولامىز. بيىل مەن 300 گەكتار جەرگە قانت قىزىلشاسىن ەگۋدى  جوسپارلاپ وتىرمىن. ەندى كاسىپورىندار بۇل سەكىلدى كەلەڭسىزدىكتەرگە جول بەرمەيدى دەپ ۇمىتتەنەمىز», دەدى «اسپان اگرو» شارۋا قوجالىعىنىڭ توراعاسى ساحا ماناتوۆ.

جامبىل وبلىسى