بۇگىننەن باستاپ نۇر-سۇلتان قالاسىنىڭ باسقارۋ شتابىمەن «كوكتەم-2020» رەسپۋبليكالىق كوماندالىق-شتابتىق وقۋ-جاتتىعۋ وتكىزىلە باستادى. بۇل تۋرالى ۇكىمەت وتىرىسىندا ىشكى ىستەر ءمينيسترى ەرلان تۇرعىمباەۆ مالىمدەدى.
ءمينيستردىڭ ايتۋىنشا, سۋ تاسقىنى قاتەرلەرىنىڭ الدىن الۋ جانە ولاردى جويۋ جونىندەگى 2017-2020 جىلدارعا ارنالعان جول كارتاسى ىسكە اسىرىلۋدا. بۇل وتكەن 3 جىل ىشىندە 437 ەلدى مەكەندە سۋ باسۋ قاۋپىن بولدىرماۋعا جانە 287 ەلدى مەكەندە سۋ باسۋ قاۋىپ-قاتەرىن بارىنشا ازايتۋعا مۇمكىندىك بەردى. ماتەريالدىق-تەحنيكالىق جاراقتاۋ بويىنشا جول كارتاسى شەڭبەرىندە 900 بىرلىك تەحنيكا, ونىڭ ىشىندە موتوپومپالار, ءجۇزۋ قۇرالدارى, جول تالعامايتىن قۇرالدار ساتىپ الىندى.
«جالپى, بيىل سۋ تاسقىنىنا تولىق ازىرلىك تۋرالى ايتۋعا ءالى ەرتە. سۋ قورعاۋ ايماقتارى شەگىندە ورنالاسقان ۇيلەردىڭ تۇرعىندارىن قاۋىپسىز ۋچاسكەلەرگە كوشىرۋ بويىنشا جوسپارلانعان ءىس-شارالار ورىندالماي جاتىر. بۇل وتە شىعىندى ءىس-شارا ەكەنى ءسوزسىز, الايدا جۇمىس ىستەلىنبەسە, سالدارى بۇدان دا اۋقىمدى بولۋى مۇمكىن», - دەدى ە. تۇرعىمباەۆ.
سونداي-اق ول 2019 جىلى جوسپارلانعان 91 ءىس-شارانىڭ 36-سى ىسكە اسىرىلماي قالعانىن ايتتى.
«2020 جىلى 132 ءىس-شارانىڭ ىسكە اسىرىلماۋ قاۋىپى بار, سولاردىڭ 53 ءىس-شاراسى بويىنشا رەسپۋبليكالىق بيۋدجەتتەن قارجىلاندىرۋ كوزدەلگەن. وسىعان بايلانىستى ىشكى ىستەر مينيسترلىگى مۇددەلى مەملەكەتتىك جانە جەرگىلىكتى اتقارۋشى ورگاندارعا جوسپارلانعان ءىس-شارالاردى جۇزەگە اسىرۋ ءۇشىن قاراجات قاراستىرۋدى, 2020 جىلى جول كارتاسىنىڭ بارلىق ءىس-شارالارىن اياقتاۋ جونىندە قاجەتتى شارالار قابىلداۋدى جانە اۋماقتاردى دامىتۋ جوسپارلارى شەڭبەرىندە جەرگىلىكتى اتقارۋشى ورگاندارعا سۋ تاسقىنى قاۋىپ-قاتەرلەرىنىڭ الدىن الۋ جانە جويۋ جونىندەگى جۇمىستى جالعاستىرۋدى ۇسىنادى», - دەدى مينيستر.