ەلوردالىق توتەنشە جاعدايلار دەپارتامەنتى قىزمەتكەرلەرى ءبىر تاۋلىك ىشىندە بوراننان 107 ادامدى قۇتقاردى. ال قار كەپتەلىستەرىنەن 17 بىرلىك تەحنيكا شىعارىلدى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
19 اقپاننان باستاپ نۇر-سۇلتان قالالىق توتەنشە جاعدايلار دەپارتامەنتىندە قالانىڭ ازاماتتىق قورعانىس قىزمەتتەرىنىڭ قاتىسۋىمەن جەدەل شتاب جۇمىس ىستەيدى. بۇگىنگى كۇنى ءۇش جەدەل تەلەفون جەلىسى (24-52-12, 24-51-47, 24-51-71) ۇيىمداستىرىلدى. ولارعا قازىرگى ۋاقىتقا دەيىن 71 تەلەفون قوڭىراۋى كەلىپ ءتۇستى.
ال «112» قىزمەتىنىڭ شۇعىل تەلەفونىنا 20 اقپاندا 1 023 قوڭىراۋ كەلىپ تۇسكەن. 20 اقپاندا ساعات 10-00-دەگى جاعداي بويىنشا قالادان بارلىق باعىتتار بويىنشا جول جابىلدى. قازىرگى ۋاقىتتا تراسسالاردا 85 بىرلىك اۆتوكولىكتەر جينالۋدا. قالا ىشىندە جانە تراسسالاردا 24 باعىت بويىنشا توتەنشە جاعدايلار دەپارتامەنتى مەن قالالىق پوليتسيا دەپارتامەنتىنىڭ قىزمەتكەرلەرى اۆتوموبيل كولوننالارىن جانە جولداردى تازالاۋ بويىنشا ارنايى تەحنيكانى سۇيەمەلدەۋ, سونداي-اق اۆاريالىق-قۇتقارۋ جانە كەزەك كۇتتىرمەيتىن جۇمىستاردى جۇرگىزۋ بويىنشا پاترۋلدەۋ جۇمىسىن ۇيىمداستىردى.
قازىرگى كەزدە «نۇرسۇلتان نازارباەۆ» حالىقارالىق اۋەجايى مەن تەمىرجول قاتىناسى شتاتتىق رەجيمدە جۇمىس ىستەيدى. ءبىلىم بەرۋ مەكەمەلەرىندە ساباق توقتاتىلعان جوق. ەلوردالىق تجد تۇرعىندارعا قاۋىپسىزدىك ەرەجەلەرىن ساقتاپ, اۋا رايىنىڭ وزگەرۋى تۋرالى اقپاراتتى جانە ەنگىزىلگەن شەكتەۋلەردى ءجىتى قاداعالاۋدى سۇرايدى.
ايتا كەتسەك, بۇگىن سينوپتيكتەر مالىمەتى بويىنشا اۋا رايى جاۋىن-شاشىنسىز, تۇندە بوران كۇتىلەدى. ال 21 اقپاندا كوشپەلى بۇلت شىعىپ, تۇندە تۇمان بولادى.