2018 جىلدان باستاپ 2022 جىل ارالىعىندا قازاقستان رەسپۋبليكاسىنىڭ ۇلتتىق حالىق ساناعىنا دايىندىق جانە وتكىزۋ ءۇشىن كوميتەتكە 8,2 ملرد تەڭگە سوماسىندا قارجى قاراستىرىلعان. بۇل تۋرالى ماڭعىستاۋ وبلىسى «قوعامدىق كوممۋنيكاتسيا قىزمەتى» الاڭىندا وتكەن بريفينگ بارىسىندا قازاقستان رەسپۋبليكاسى ۇلتتىق ەكونوميكا مينيسترلىگى ستاتيستيكا كوميتەتىنىڭ توراعاسى نۇربولات ايداپكەلوۆ ءمالىم ەتتى.
2020 جىلى ۇلتتىق حالىق ساناعىن وتكىزۋ كەزىندە ۆيزۋالدى فيرمالىق ءستيلدى قالىپتاستىرۋ ماقساتىندا ۇلتتىق حالىق ساناعىنىڭ لوگوتيپى ازىرلەنگەن. حالىق ساناعى شارتتى ەكى كەزەڭنەن تۇرادى. دايىندىق كەزەڭى. ماۋسىم ايىنىڭ 1 مەن 30 ارالىعىندا ينتەرۆيۋەرلەر تۇرعىن ۇيلەر مەن تۇرعىن ەمەس ءۇي-جايلاردىڭ, قۇرىلىستاردىڭ, سونداي-اق ونداعى تۇراتىن تۇرعىنداردىڭ ناقتى سانىن انىقتاۋ ماقساتىندا ءاربىر ەلدى مەكەندى ارالاپ شىعادى. بۇل كەزەڭدە اۋدانداستىرۋعا دايىندىق جۇرگىزىلەدى.
ساناقتىق اۋدانداستىرۋ – بۇل وڭىردەگى ءاربىر ەلدى مەكەننىڭ اۋماعىن ساناقتى وتكىزۋ ءۇشىن نۇسقاۋشىلىق جانە ەسەپتىك ۋچاسكەلەرگە ءبولۋ.
نەگىزگى كەزەڭ (قازان ايىنىڭ 1 مەن 30 ارالىعى). قازان ايىنىڭ 1 مەن 15 ارالىعىندا, ياعني تىكەلەي حالىق ساناعىنىڭ العاشقى 15 كۇنىندە ينتەرنەت-ساۋالناما جۇرگىزىلەدى. ينتەرنەت-ساۋالنامادا رەسپوندەنتتەر وزىنە جانە وتباسى مۇشەلەرىنە ينتەرنەت جەلىسى ارقىلى sanaq.gov.kz ارنايى سايتىندا ساناق پاراقتارىن ءوز بەتىنشە تولتىرادى. سونىمەن بىرگە سايتتا رەسپوندەنتتەرگە ارنالعان تۇسىندىرمەلەر مەن ارنايى ۆيرتۋالدى كومەكشى دە بار.
ينتەرنەت-ساۋالنامامەن قاتار 1-30 قازان ارالىعىندا ينتەرۆيۋەرلەر دە ساۋالناما جۇرگىزەدى. ساۋالناما جاۋاپتارى پلانشەتكە ەنگىزىلەدى. ينتەرنەت ارقىلى مالىمەتتەر بەرگەن رەسپوندەنتتەر ينتەرۆيۋەرلەر جۇرگىزەتىن ساۋالناماعا قاتىسپايدى. حالىققا ساۋالناما جۇرگىزۋ بارىسىندا رەسپوندەنتتى سايكەستەندىرۋ ءۇشىن سۇرالاتىن ادامنىڭ جسن-ءى پايدالانىلادى. ساۋالناما اياقتالعاندا حالىق ساناعىنان وتكەنى تۋرالى انىقتاما بەرىلەدى.
سونداي-اق 2009 جىلعى قازاقستان رەسپۋبليكاسى حالىق ساناعىنىڭ بيۋدجەتى 6,5 ملرد تەڭگەنى قۇرادى. 2009 جىلعى حالىق ساناعىن وتكىزۋ كەزىندە ءبىر ادامعا شاققانداعى شىعىندار - 2,9 اقش دوللارىن قۇراسا, 2020 جىلى - 1,2 اقش دوللارىن قۇرايدى.