تاشكەنتتە اۋىر اتلەتيكادان ءوتىپ جاتقان جاستار مەن جاسوسپىرىمدەر اراسىندا ازيا بىرىنشىلىگىندە قازاقستان قۇراماسى تابىستان تابىسقا جەتۋدە.
كەشە جەرلەستەرىمىز تاعى ەكى التىن مەدالدى يەلەندى. جاسوسپىرىمدەردىڭ 81 كيلو سالماق دارەجەسىندەگى سايىسىندا كارينا قۇزعانباەۆا قوسسايىستىڭ قورىتىندىسى بويىنشا 227 (101+126) كيلولىق زىلتەمىردى ەڭسەرىپ, التىننان القا تاعىندى.
اسا اۋىر سالماقتا كۇش سىناسقان ايسامال سانسىزباەۆانىڭ دا ونەرى كورەرمەندەردىڭ كوڭىلىنەن شىقتى. شەشۋشى تۇستا تايپەي مەن موڭعوليا وكىلدەرىنە شاڭ قاپتىرىپ كەتكەن قازاق قىزى 249 (109+140) كيلولىق كورسەتكىشپەن باس جۇلدەنى ولجالادى.
وسى كۇنگە دەيىن قازاقستاننىڭ اۋىر اتلەتتەرى اراسىنان 55 كيلو سالماقتاعى ابىلاي اۋەلحانوۆ قوسسايىستىڭ قورىتىندىسى بويىنشا 227 (97+130) كيلولىق زىلتەمىردى ەڭسەرىپ, جاسوسپىرىمدەر اراسىندا ەكىنشى جانە جاستار اراسىندا ءۇشىنشى ورىندى يەلەندى.
64 كيلو سالماقتاعى گۇلنۇر ىبىراي جاسوسپىرىمدەر سايىسىندا التىننان القا تاعىنسا, جاستار اراسىندا كۇمىس مەدالدى موينىنا تاقتى. قازاق قىزىنىڭ كورسەتكىشى – 198 (88+110) كيلو.
61 كيلو سالماقتاعى اقمولدا سايرامكەز 267 (117+150) كيلولىق ناتيجەمەن جاستار اراسىنداعى جارىستى قولا مەدالمەن قورىتىندىلادى.
67 كيلو سالماقتاعى سايحان تايسۋەۆ باس جۇلدەنى ولجالادى. قوسسايىستىڭ قورىتىندىسى بويىنشا 299 (130+169) كيلونى ەڭسەرگەن ول قارسىلاس شاق كەلتىرمەدى.
وسىلايشا, ازىرگە قازاقستان قۇراماسى ساپىندا ونەر كورسەتكەن التى جەرلەسىمىز جەڭىس تۇعىرىنا كوتەرىلدى. الداعى كۇندەرى ەسەنكەلدى ءساپي (81 كيلو), نۇرعيس ادىلەت ۇلى (89 كيلو), ارتەم انتروپوۆ (96 كيلو) جانە راقات بەكبولات ( 96 كيلو) جارىس جولىنا شىعادى. ال وسى دودا 20 اقپاندا ءوز مارەسىنە جەتەدى.