تەننيستەن قازاقستاننىڭ ءبىرىنشى راكەتكاسى ەلەنا رىباكينا رەسەيدىڭ سانكت-پەتەربۋرگ قالاسىندا جۇلدە قورى 848 مىڭ اقش دوللارىن قۇراعان «WTA Premier» ءتۋرنيرىنىڭ فينالىندا ونەر كورسەتتى.
باس جۇلدە ءۇشىن وتكەن باسەكەدە وتانداسىمىز نيدەرلاند وكىلى كيكي بەرتەنسپەن باق سىناستى. ەكى سەتكە سوزىلعان كەزدەسۋدە 6:1, 6:3 ەسەبىمەن بەرتەنستىڭ باعى جاندى. ال ەلەنا وسىمەن WTA تۋرنيرىندەگى ءۇشىنشى فينالىنىڭ ەكەۋىندە جەڭىلىس تاپتى. بۇل رىباكينا مەن بەرتەنستىڭ كورتتاعى ەكىنشى تەكەتىرەسى. بىلتىر حالىقارالىق ءتۋرنيردىڭ جارتىلاي فينالىندا كەزدەسىپ, ول كەزدە دە نيدەرلاند سپورتشىسىنىڭ ءباسى بيىك بولعان-دى. فينالدىق كەزدەسۋگە دەيىن رىباكينا الەمنىڭ 25-ءشى, بەرتەنس سەگىزىنشى راكەتكاسى بولاتىن.
فينالدىق سايىستان كەيىن 20 جاستاعى وتانداسىمىز الەمدىك رەيتينگتە 19-ورىنعا كوتەرىلدى. بۇل – قازاقستان تەننيسى تاريحىنداعى ەڭ جوعارى كورسەتكىش. ويتكەنى بۇعان دەيىنگى ەڭ ۇزدىك ناتيجەمىز – 25-ورىن ەدى. بۇل ناتيجەگە 2012 جىلى ياروسلاۆا شۆەدوۆا جانە بيىل ەلەنا رىباكينا قول جەتكىزگەن-ءدى. ءسويتىپ رىباكينا قازاقستان تەننيس تاريحىنىڭ جاڭا پاراعىن اشتى.