قالا اكىمى التاي كولگىنوۆ قالا مەن شەتكەرى ايماقتاردى سۋ تاسقىنىنان قورعايتىن سۋ رەتتەگىشتىڭ جۇمىسىمەن تانىستى. ساپار بارىسىندا اكىمگە گيدروتەحنيكالىق قۇرىلىستاردىڭ دايىندىعى مەن استانا سۋ قويماسىنىڭ جاعدايى تۋرالى باياندالدى. تاسقىن سۋلاردى قابىلداۋ مەن وتكىزۋگە قاتىستى ماسەلەلەر تالقىلاندى, دەپ حابارلادى قالا اكىمدىگىنىڭ ءباسپاسوز قىزمەتى.
التاي كولگىنوۆ سۋ رەتتەگىشتىڭ جاعدايىنا ۇنەمى مونيتورينگ جۇرگىزىپ, سۋ تاسقىنىنا قارسى جاعدايدى باقىلاۋدا ۇستاۋ قاجەتتىگىن اتاپ ءوتتى. ەلوردا اكىمى سۋ تاسقىنىنا قارسى ءىس-شارالاردىڭ كەشەندى جوسپارىن بەكىتتى, شتاب قۇرىلدى. كوكتەمدە سۋ تاسقىنىن بولدىرماۋ, ارىق-لوتوكتىق جەلىلەردى جانە نوسەر-كاناليزاتسيا جۇيەلەرىن تازالاۋ بويىنشا جوسپار بەكىتىلدى.
قىسقى كەزەڭدە 3,7 ملن تەكشە مەترگە جۋىق قار شىعارىلدى (300 مىڭ رەيس), بۇل وتكەن قىستىڭ وسىنداي كەزەڭىمەن سالىستىرعاندا 50% - عا ارتىق. كامازدار كۇنىنە 2,5 مىڭ رەيس جاسايدى. كۇن سايىن قالانى قاردان 2 مىڭ بىرلىك تەحنيكا مەن 1,5 مىڭنان استام جول جۇمىسشىلارى تازالاپ جاتىر. بوران جانە قالىڭ قار جاۋعان كەزدە ۇيىمداردىڭ قوسىمشا ارنايى تەحنيكاسى قار تازالاۋ جۇمىستارىنا تارتىلادى.