قازاقستان رەسپۋبليكاسى پرەزيدەنتىنىڭ لاتىن نەگىزدى قازاق ءتىلى ءالىپبيىن جەتىلدىرۋگە قاتىستى تاپسىرماسىنا جانە ەكس-پرەمەر-ءمينيستردىڭ ورىنباسارى بەردىبەك ساپارباەۆ بەكىتكەن «قازاق ءتىلىنىڭ لاتىن گرافيكاسى نەگىزىندەگى ءالىپبيىن جەتىلدىرۋ بويىنشا 2020-2025 جىلدارعا ارنالعان ءىس-شارالار جوسپارىنا» سايكەس قازاقستان رەسپۋبليكاسى مادەنيەت جانە سپورت مينيسترلىگى وڭىرلەردە جوعارى جانە ارناۋلى وقۋ ورىندارىنىڭ فيلولوگ عالىمدارى مەن وقىتۋشىلارىنىڭ اراسىندا اعىمداعى جىلى 14 اقپاندا اشىق تالقىلاۋ وتكىزۋ تۋرالى ۇسىنىس بەرگەن بولاتىن.
وسىعان وراي بۇگىن نۇر-سۇلتان قالاسى اكىمدىگى, تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن قازاق الىپبيىنە قاتىستى اشىق تالقىلاۋ ءوتتى. وندا لاتىن گرافيكاسىنداعى قازاق ءالىپبيىنىڭ وزگەرتىلگەن نۇسقاسى تالقىلاندى. جيىنعا ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ, ەۋرازيا گۋمانيتارلىق ينستيتۋتىنىڭ, م.س. نارىكباەۆ اتىنداعى قازاق گۋمانيتارلىق زاڭ ۋنيۆەرسيتەتىنىڭ, كولىك جانە كوممۋنيكاتسيا كوللەدجىنىڭ, گۋمانيتارلىق كوللەدجدىڭ عالىمدارى مەن بىلىكتى ماماندارى, مەكتەپ مۇعالىمدەرى, بالاباقشا تاربيەشىلەرى قاتىستى.
قالادا وتكىزىلگەن اشىق تالقىلاۋدىڭ قورىتىندىسى قازاق ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنان قۇرىلعان جۇمىس توپتارىنىڭ كەڭەيتىلگەن وتىرىسىنا ۇسىنىلادى.