اقتاۋ قالاسى 4 ش/ا 57 ءۇيدىڭ تۇرعىنى كورشىسىنىڭ كەسىرىنەن ەكى قىزىمەن اۋرۋحاناعا ءتۇسىپ قالدى. بۇل تۋرالى ماڭعىستاۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى حابارلادى.
جەدەل جاردەم بريگاداسى 42 جاستاعى ايەل مەن 15 پەن 10 جاسار ەكى قىزىنا حيميكالىق زاتتارمەن ۋلانعان دەگەن دياگنوز قويعان. وزدەرىن جايسىز سەزىنگەندەرى ەسكەرىلىپ, شۇعىل تۇردە اناسىن وبلىستىق اۋرۋحاناعا, ال قىزداردى كوپبەيىندى بالالار اۋرۋحاناسىنا جەتكىزگەن. ايەلگە ءتيىستى مەديتسينالىق كومەك كورسەتىلگەن سوڭ, ۇيىنە جىبەرىلگەن. ابىروي بولعاندا وعان اۋرۋحاناعا جاتىپ ەم-دوم قابىلداۋ قاجەتتىلىگى بولمادى. الايدا ەكى قىزىن اۋرۋحاناعا جاتقىزۋعا تۋرا كەلدى. كەپىلدەندىرىلگەن تەگىن مەديتسينالىق كومەك, دونور كومەك جانە مىندەتتى الەۋمەتتىك مەديتسينالىق ساقتاندىرۋ اياسىندا بارلىق ەم-دوم شارالارى ۇيىمداستىرىلدى. ەكى قىزدىڭ جاعدايى تۇراقتى. ومىرلەرىنە ءتونىپ تۇرعان قاۋىپ جوق. ەكى-ءۇش كۇندە ۇيىنە جىبەرىلەدى دەپ كۇتىلۋدە.
زارداپ شەگۋشى يۋليا مولدوۆاننىڭ ايتۋىنشا, بۇل جاعداي وسىدان ەكى كۇن بۇرىن بولعان.
- ۇيگە كەلسەم, جاعىمسىز ءيىستىڭ بارىن سەزدىم, ۇيدە ۇلكەن قىزىم بار ەدى, سودان سۇراسام, بۇل ءيىستىڭ پايدا بولعانىنا ءبىراز بولعانىن ايتتى. توتەنشە جاعدايلار جانە پوليتسيا دەپارتامەنتتەرىنە حابارلاستىم. ولار كەلە سالىسىمەن ءۇيدىڭ يەسىن تاۋىپ, شاقىرتقان بولاتىن. ۇيىنە كىرىپ قاراساق, راسىندا دا, قاندالانى ۋلايمىن دەپ ەسىگىن كىلتتەپ, وزدەرى باسقا مەكەن جايعا كەتىپ قالعان. نەگە كورشىلەرگە ەسكەرتپەدىڭىز دەسە, نە ءۇشىن ەسكەرتۋىم كەرەك دەپ جەڭىستىك بەرمەدى. العاشىندا اۋانى تازارتۋ ءۇشىن بالكونداعى تەرەزەنى اشىپ, ءبىر تاۋلىككە قالدىرعان ەدى. ال كەشە ۇيگە كەلسەم, تاعى دا تەرەزەنى جاۋىپ كەتكەن, قايتادان جاعىمسىز ءيىستى سەزىندىك. قۇسقىمىز كەلىپ, باسىمىز اينالدى, قىزدارىمنىڭ جاعدايى بىردەن ناشارلاي تۇسكەنىن بايقادىم, ۇيدە وتىرۋ مۇمكىن بولماعان سوڭ جەدەل جاردەم ستانساسىنا حابارلاستىم. وسىلايشا, بالالار اۋرۋحاناسىنان ءبىر-اق شىقتىق. ەكى كۇن بولدى, قاجەتتى مەديتسينالىق كومەگىن الىپ جاتىر. دارىگەرلەرگە العىسىم شەكسىز, كۇندىز-ءتۇنى قاسىمىزدا. ەندى كورشىمنىڭ ۇستىنەن شاعىم تۇسىرەمىن, ءتيىستى جازاسىن السىن, - دەيدى ول.
ايتا كەتۋ كەرەك, جىل باسىنان بەرى قاندالانى ۋلاۋ كەزىندە كورشى پاتەر تۇرعىندارىنىڭ حيميالىق زاتتان ۋلانۋ بويىنشا بۇل - ەكىنشى دەرەك. ال وتكەن جىلى وسىنداي دەرەك بويىنشا جەدەل جاردەم قىزمەتىنە تۇرعىندار 13 رەت تەلەفون شالعان. وكىنىشكە قاراي, سالدارىنان كوز جۇمعاندار بولدى, ارالارىندا كامەلەتتىك جاسقا تولماعان بالالار مەن ەرەسەكتەر دە بار.