مەملەكەتتىك قىزمەت تاراپىنان جاسالاتىن كەيبىر شەكتەن شىققان بيۋروكراتيالىق كەدەرگىلەر كەيدە توتەنشە جاعدايلارعا قارسى جەدەل ارەكەت ەتۋگە دە كەدەرگى كەلتىرىپ جاتادى. سونداي ءبىر كەدەرگىنىڭ مىسالىن تومەندە جازىپ وتىرمىز.
بيىل قار كوپ, سوندىقتان قارعىن سۋدىڭ قاتەرى مول بولۋعا ءتيىستى. اسىرەسە, سولتۇستىك پەن شىعىس وبلىستارىندا قارت كۇرت ەرىسە سۋ باسۋ قاۋپى زور. ۇكىمەت تە, ەل دە وسىعان الاڭداۋلى. وبلىستارداعى ءتيىستى قىزمەتتەردىڭ قارعىنعا قارسى ءىس ارەكەتتەرىن حالىققا جەتكىزىپ, ولاردىڭ قوبالجىماۋىن ويلاعان «ەگەمەننىڭ» باسشىلىعى دا ءبىر بەتىن تۇتاستاي وسى ماسەلەگە ارناپ, ايماقتارداعى تىلشىلەرگە ءوز وبلىستارىنداعى احۋالدى جازۋعا تىعىز تاپسىرما بەرگەن ەكەن.
تىعىز تاپسىرما بىزگە 11 اقپان كۇنى كەشكە ءتۇستى. ماسەلەنىڭ ماڭىزدىلىعىن ەسكەرىپ, ءتۇن بولىپ قالعانىنا قاراماي وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىندەگى بۇرىننان بىلەتىن ەۆگەني جۋراۆلەۆقا ۆاتساپپەن حات جىبەرىپ, ىستەلىپ جاتقان جۇمىستار تۋرالى اقپارات بەرۋىن ءوتىندىم. وبالى نە كەرەك, ول بىردەن جاۋاپ بەرىپ, تاڭەرتەڭ جىبەرەيىن دەدى.
وسىعان قاناعاتتانعان باسىمىز كۇندىزگى ساعات ون بىرگە دەيىن حابار توستىق. ەۆگەنيدەن ەش حابار جوق, تىم تىرس. ۇمىتىپ كەتكەن بولار دەپ تەلەفون سوقساق, المايدى, حات جازساق, جاۋاپ بەرمەيدى. امال جوق تج دەپارتامەنتى باستىعىنىڭ ورىنباسارى پاۆەل شيلوۆ مىرزاعا حابارلاسساق, «دايتە نام وفيتسيالنىي زاپروس» دەپ بىلق-سىلق ەتەدى. ونداي ساۋالدى مەن جاساعانشا ءبىر-ەكى كۇن, جاۋاپ كەلگەنشە ەكى-ءۇش كۇن وتپەي مە دەسەك, مەن ءبىر قۇپيا اقپارات سۇراپ تۇرعانداي «يناچە نە موگۋ» دەپ مايىسادى...
مىنە, جەدەل ارەكەت ەتۋگە ءتيىستى قىزمەتتىڭ جەدەل جاۋابىنىڭ ءتۇرى وسىنداي ەكەن. ارەكەتى قانداي بولارىن ءبىر اللا ءبىلسىن... مۇنداي قىزمەتكەرلەر جاناشىر بولسا, قازىر ۇيىقتاپ جاتسا تۇسىندە قارعىن سۋدى كورۋگە ءتيىستى ەدى عوي...
تەك ءتۇس الەتىنە قاراي عانا ە.جۋراۆلەۆتەن حابار الدىق. ونىڭ ايتۋىنا قاراعاندا ازىرگە سولتۇستىكتە ەشقانداي كۇرت دايىندىق جوق, تەك قار شىعارۋ جۇمىستارى مەن تەحنيكالاردى دايىنداۋ شارالارى عانا جۇرگىزىلىپ جاتىر ەكەن. سونىڭ ىشىنە جەدەل ارەكەت ءۇشىن وبلىس اۋماعىندا 484 ادام, 155 تەحنيكا, 8 ءجۇزۋ قۇرال جانە 72 موتوپومپا بار ىشكى ىستەر ورگاندارى اراسىنان كۇشتەر توبى قۇرىلعان. ال جەرگىلىكتى اتقارۋشى ورگاندار تاراپىنان, الدىن دەرەكتەر بويىنشا, كوكتەمگى كەزەڭگە جەكە قۇرامنان 1619 ادام, 1163 تەحنيكا, ونىڭ ىشىندە 299 سۋ سورعىش تەحنيكا, 109 اۋىر ينجەنەرلىك تەحنيكا جانە 83 ءجۇزۋ قۇرال, جانار-جاعار ماي جانە ينەرتتى ماتەريالدار, قاپتار دايىندالىپتى. ايتا قالارلىق شارانىڭ قاتارىندا 6637 اسكەري بولىمىندە توتەنشە جاعدايدان زارداپ شەككەندەرگە كومەك كورسەتۋ بويىنشا ساباقتار وتكىزىلگەن. سونداي-اق ۇلتتىق ۇلاننىڭ كۇشتەرى جەدەل كومەك كورسەتۋ ءۇشىن قۇرامىندا 60 ادام مەن 4 تەحنيكا بار كونتينگەنت بولگەن. الايدا, تج باسشىلىعى وسىنىڭ ءبارىن جادىندا ۇستاپ, جارقىراتىپ ايتا الماسا, قاعاز جۇزىندەگى اقپارلار قانشالىقتى الەۋەتتى بولارىنا سەنۋ وڭاي ەمەس.
سولتۇستىك قازاقستان وبلىسى