ۇكىمەت وتىرىسىندا ەلىمىزدىڭ الەۋمەتتىك-ەكونوميكالىق دامۋىنىڭ قورىتىندىلارى تالقىلاندى

ەكونوميكانىڭ, بانك سالاسىنىڭ جاي-كۇيى, رەسپۋبليكالىق بيۋدجەتتىڭ اتقارىلۋى, مەملەكەتتىك ساتىپ الۋلارداعى جەرگىلىكتى قامتۋ تۋرالى قر ۇلتتىق ەكونوميكا ءمينيسترى ر. دالەنوۆ, ۇلتتىق بانك توراعاسىنىڭ ورىنباسارى ا. بايماعامبەتوۆ جانە پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ باياندادى.

2020 جىلدىڭ ءبىرىنشى ايىنىڭ قورىتىندىسى ماكروەكونوميكالىق كورسەتكىشتەردىڭ وڭ سەرپىنىن كورسەتتى. وسى جىلعى قاڭتاردا ءجىو ءوسىمى 2019 جىلعى قاڭتارداعى 2,9%-عا قاراعاندا 3,6%-عا دەيىن جىلدامدادى. نەگىزگى كاپيتالعا سالىنعان ينۆەستيتسيالار 3,1%-عا ءوستى.

ەكونوميكانىڭ بارلىق نەگىزگى سالالارىندا وڭ سەرپىن بايقالادى: قۇرىلىستا ءوسىم 12,5%-دى, ساۋدادا – 5,2%-دى, كولىك سالاسىندا – 3,6%-دى, تاۋ-كەن ونەركاسىبىندە, وڭدەۋ سەكتورىندا, ونىڭ ىشىندە ماشينا جاساۋدا 21%-دى, قارا مەتاللۋرگيادا 17,5%-دى قۇرادى.

ۇلتتىق قوردىڭ اكتيۆتەرى 6,8%-عا $61,9 ملرد-قا دەيىن ۇلعايدى, رەسپۋبليكالىق بيۋدجەتكە تۇسەتىن كىرىستەر 929,7 ملرد تەڭگەگە جەتتى (جوسپارعا 95%), ءوسۋ قارقىنى 131%-دى قۇرادى.

2020 جىلعى قاڭتاردا 732 مىڭ شارشى مەتر تۇرعىن ءۇي پايدالانۋعا بەرىلدى. نۇر-سۇلتان جانە الماتى قالالارىندا, سونداي-اق ماڭعىستاۋ وبلىسىندا تۇرعىن ۇيلەردىڭ كوبىرەك پايدالانۋعا بەرىلگەنى بەلگىلەنگەن.

«ەلباسى نۇرسۇلتان ءابىش ۇلى نازارباەۆ پەن پرەزيدەنت قاسىم-جومارت كەمەل ۇلى توقاەۆتىڭ تاپسىرمالارىن ورىنداۋ ماقساتىندا بيىل ءبىرىنشى ايدان باستاپ ەكونوميكانىڭ ءوسۋ قارقىنىن ساقتاۋ قاجەت», — دەدى ا. مامين. 

پرەمەر-مينيستر اتىراۋ, تۇركىستان, پاۆلودار جانە شىعىس قازاقستان وبلىستارىندا وسى جىلدىڭ قاڭتار ايىندا نەگىزگى كورسەتكىشتەر بويىنشا وڭ ديناميكا بايقالاتىنىن اتاپ ءوتتى.

ۇكىمەت باسشىسى مەملەكەتتىك ورگاندار مەن وڭىرلەر باسشىلارىنىڭ ينۆەستيتسيالاردى تارتۋ, شاعىن جانە ورتا بيزنەستى دامىتۋ, ەڭبەك ونىمدىلىگىن جانە حالىقتىڭ ناقتى تابىسىن ارتتىرۋ جونىندەگى جۇمىستى كۇشەيتۋى قاجەت ەكەنىن اتاپ ءوتتى.