بۇگىن, 10 اقپان كۇنى, قازاقستان بياتلونشىلار وداعىنىڭ پرەزيدەنتى ەرمەك قيزاتوۆتىڭ جەتەكشىلىگىمەن وداقتىڭ تارتىپتىك كوميسسياسىنىڭ كەزەكتەن تىس جيىنى ءوتتى. اتالعان جيىنعا مادەنيەت جانە سپورت مينيسترلىگى, سونداي-اق, قازاقستان ۇلتتىق وليمپيادالىق كوميتەتىنىڭ وكىلدەرى قاتىستى. كوميسسيا مۇشەلەرى الەم چەمپيوناتى قارساڭىندا اۆستريادا ءوتىپ جاتقان وقۋ-جاتتىعۋ جيىندارىندا سپورتتىق رەجيم مەن ءتارتىپتى بۇزعان ءتورت قازاقستاندىق سپورتشىنىڭ ماسەلەسىن قاراستىردى. بۇل جايىندا ۇلتتىق وليمپيادالىق كوميتەتتىڭ ءباسپاسوز قىزمەتى حابارلادى.
قازاقستان ۇلتتىق قۇراماسىنىڭ ساپىنان ءتورت سپورتشى شەتتەتىلدى. ولار بياتلوننان وتەتىن رەسپۋبليكالىق جانە حالىقارالىق جارىستارعا قاتىستىرىلمايدى. اتاپ ايتار بولساق, انتون پانتوۆ ءتورت جىلعا, تيمۋر كۋتس, ۆلاديسلاۆ ۆيتەنكو جانە رومان ەرەمين ءبىر جىلعا سپورتتان شەتتەتىلدى. سپورتشىلاردىڭ بارلىعى جاتتىعۋ جيىنىنان قايتارىلعان.
شەشىمدى قابىلداۋعا بياتلوننان ۇلتتىق قۇراما باس باپكەرى ماقسات شارانوۆتىڭ راپورتى جانە سپورتشىلار مەن باپكەرلەردىڭ تۇسىنىكتەمەسى سەبەپ بولدى. سونداي-اق وبەرتيللاح قالاسىنداعى وقۋ-جاتتىعۋ جيىنى كەزىندە كوماندا مۇشەلەرى تۇراقتاعان اۆستريالىق قوناقۇيدىڭ ارىز-شاعىمى دا نازاردان تىس قالعان جوق.
«قازاقستان ۇوك وكىلدەرى مەن مادەنيەت جانە سپورت مينيسترلىگى, سونىمەن قاتار, ۇلتتىق فەدەراتسيا مۇشەلەرى سپورتتىق رەجيمدى ورەسكەل بۇزعان اتلەتتەردى ۇلتتىق قۇرامادان شەتتەتۋ تۋرالى شەشىمدى ءبىراۋىزدان قابىلدادى. سپورتشىلار جاتتىعۋ جيىنىندا ءتارتىپ بۇزىپ قانا قويماي, ءوز ەلدەرىنىڭ ابىرويىنا نۇقسان كەلتىرىپ وتىر. حالىقارالىق جارىس بولسىن, جابىق وقۋ-جاتتىعۋ جيىندارى بولسىن, قازاقستان كومانداسىنىڭ مۇشەسى ءوز ەلىنىڭ بەدەلىنە كىر كەلتىرمەۋى قاجەت. بۇل وقيعا ۇلتتىق قۇراما نامىسىن قورعايتىن بارشا سپورتشىلارعا ساباق بولادى دەپ ويلايمىن. قازاقستان ۇوك سپورتتىق ءتارتىپتى بۇزۋشىلارعا تۇبەگەيلى قارسى. مۇنداي جاعدايلار كوپ كەزدەسە بەرمەيدى, بىراق, رەجيمدى بۇزعانى ءۇشىن ءاربىر اتلەت پەن باپكەرلەر جاۋاپكەرشىلىك ارقالايتىنىن ەسكەرتكىمىز كەلەدى. وسى ورايدا, اتالعان جاعدايعا قاتىستى دەرەۋ شەشىم قابىلداعان قازاقستان بياتلونشىلار وداعىنا العىس ايتامىز», - دەدى قازاقستان ۇوك سپورت ديرەكتسياسىنىڭ باسشىسى ەلسيار قاناعاتوۆ.
بياتلوننان قازاقستان كومانداسىنىڭ باپكەرلەر قۇرامىنا قاتىستى ءتيىستى تارتىپتىك شارالار بولەك قابىلدانادى. ايتا كەتەلىك كوميسسيا قۇرامىندا قازاقستان بياتلونشىلار وداعىنىڭ بىرىنشى ۆيتسە-پرەزيدەنت ايتالاپ قورعامباەۆ, ۆيتسە-پرەزيدەنت ەلەنا حرۋستالەۆا, قبو باس حاتشىسى ماناس ۇسەنوۆ جانە كوماندانىڭ باس باپكەرى ماقسات شارانوۆ بار.سونىمەن قاتار جيىنعا مادەنيەت جانە سپورت مينيسترلىگىنىڭ دەنە شىنىقتىرۋ جانە سپورت كوميتەتى توراعاسىنىڭ ورىنباسارى سەرىك جاراسباەۆ, ۇوك قىسقى سپورت تۇرلەرى قىزمەتىنىڭ جەتەكشىسى ولجاس بەسباەۆ تا قاتىستى.