قىزىلجار كوشەلەرىندە قاڭتار ايىندا عانا 460 جاياۋدىڭ جول ءجۇرۋ ەرەجەسىن بۇزعانى انىقتالدى. بۇل ەكى ءجۇز مىڭنان ءسال ارتىق تۇرعىنى بار شاھار ءۇشىن ۇلكەن كورسەتكىش. مۇنىڭ بىلتىرعى جىلدىڭ سايكەس مەرزىمىمەن سالىستىرعاندا از ەكەندىگىنە مىسە تۇتىپ, جاعانى جايلاۋعا جىبەرۋگە بولمايدى. جاياۋلاردىڭ جول ءجۇرۋ ءتارتىبىن ءجيى بۇزۋىنىڭ ءوزى قالا مادەنيەتىنىڭ كەمشىن ەكەنىن كورسەتەدى.
وسى ءتارتىپتى بۇزۋشىلار اكىمشىلىك قۇقىق بۇزۋشىلىق تۋرالى كودەكسىنىڭ «جاياۋ جۇرگىنشىلەردىڭ جانە وزگە دە جول جۇرىسىنە قاتىسۋشىلاردىڭ قوزعالىس ەرەجەسىن بۇزۋ» بابى بويىنشا جاۋاپكەرشىلىككە تارتىلادى. بىراق سونى ءجيى ايتىپ, جۇرگىنشىلەردىڭ قۇلاعىنا قۇيا بەرۋ جاعى ازدىق ەتەتىن سياقتى. «بارلىق دەرلىك بۇزۋشىلىقتار – بەلگىلەنبەگەن جەردە جولدى كەسىپ وتۋمەن بايلانىستى», - دەيدى سقو پد جەرگىلىكتى پوليتسيا قىزمەتى باسقارماسىنىڭ ەرەكشە تاپسىرمالار جونىندەگى اعا ينسپەكتورى, پوليتسيا كاپيتانى ازامات جامۇقوۆ.
«سونىمەن قاتار, كەيبىر جاياۋ جۇرگىنشىلەر كەلە جاتقان كولىكتىڭ بار-جوعىنا كوز جەتكىزۋ ءۇشىن جان-جاعىنا قاراۋدى دا ەستەرىنەن شىعارادى, ءتىپتى تەلەفون قۇلاققاپتارىن تاعىپ الىپ, وزدەرىن اۆتوموبيلدەردىڭ دابىلدارىن ەستۋ مۇمكىندىگىنەن ايىرادى. اۆتوموبيل تومەن جىلدامدىقپەن كەلە جاتقاننىڭ وزىندە, اسىرەسە قىس كەزىندە ونىڭ كىلت توقتۋى مۇمكىن ەمەستىگىن جاياۋ جۇرگىنشىلەر ەستەن شىعارماعانى ءجون. جاياۋ جۇرگىنشىلەر جول ءجۇرىسى ەرەجەلەرىن بۇزعاندا 2 ايلىق ەسەپتىك كورسەتكىش مولشەرىندەگى ايىپپۇلمەن قۇتىلاتىنىن عانا ويلاماي ءوزىنىڭ جانە جول قوزعالىسىنىڭ باسقا دا قاتىسۋشىلارىنىڭ ءومىرى مەن دەنساۋلىعىنا قاتەر تۋدىراتىنىن دا ەسكەرۋى كەرەك», - دەيدى كاپيتان.
جول ءجۇرۋ تارتىبىنە سايكەس كورۋ ايماعىندا وتكەل نەمەسە جول قيىلىسى بولماعاندا جولدىڭ ءجۇرۋ بولىگىنىڭ شەتىنە تىك بۇرىشتاپ, ەكى جاقتان دا جاقسى كورىنەتىن جەردەن جولدى كەسىپ وتۋگە بولادى. جولدىڭ ءجۇرۋ بولىگىن ەلدى مەكەندە ءبولۋ جولاعى بولعان كەزدە, سونداي-اق جاياۋ جۇرگىنشىلەر نەمەسە جول قورشاۋلارى ورناتىلعان جەرلەردە جاياۋ جۇرگىنشى وتكەلدەرىنەن تىس كەسىپ وتۋگە رۇقسات ەتىلمەيدى. قىزىلجارىق جاياۋلار كوبىنەسە بازار ماڭىنداعى جولداردى كەسىپ وتۋدە جول ءتارتىبىن بۇزاتىن كورىنەدى. سونىڭ ىشىندە «التىن ارمان» مەن «تايگا» بازارلارىنا كەلۋشىلەر «رەتتەلەتىن ءوتۋ جولدارى تىم الىس» دەگەن سىلتاۋدى كوپ ايتادى ەكەن. الايدا مۇنداعى جۇرگىنشىلەر وتكەلدەرىنىڭ ورنالاسۋى مەملەكەتارالىق ستاندارتپەن رەتتەلگەن. ولاردىڭ اراقاشىقتىعى 200 مەتردەن ارتىق ەمەس.
وتكەن جىلى سولتۇستىك قازاقستاندا جاياۋ جۇرگىنشىلەردىڭ كىناسىنەن جالپى سانى 31 جكو ورىن الىپ, وندا 3 ادام قايتىس بولىپ, 34-ءى جاراقات العان وسىلاردىڭ ىشىندەگى 7 وقيعادا جاياۋ جۇرگىنشىلەر ماساڭ كۇيدە بولعان.
سولتۇستىك قازاقستان وبلىسى