مامانداردىڭ بولجاۋىنا قاراعاندا, بيىلعى كوكتەمدە سۋ تاسقىنىنىڭ قاۋپى جىلداعىدان جوعارى. قاڭتار ايىندا عانا تۇسكەن قار وتكەن جىلدىڭ سايكەس مەرزىمىمەن سالىستىرعاندا ەكى جارىم ەسەگە كوپ.
قازگيدرومەت قىزمەتكەرلەرى, قۇتقارۋشىلار مەن جەرگىلىكتى بيلىك وكىلدەرى سۋ تاسقىنىنىڭ ناقتى قاۋپىن انىقتاۋ ماقساتىندا اقپان مەن ءساۋىر ارالىعىندا ايماقتاعى وزەندەرگە ەكسپەديتسيالىق باقىلاۋ جۇرگىزبەك. قۇرامىندا 500-دەن اسا قۇتقارۋشىسى بار ءوڭىردىڭ توتەنشە جاعدايلار قىزمەتى سۋ تاسقىنىنىڭ الدىن الۋ ءۇشىن بار مۇمكىندىكتى قاراستىرۋدا. 111 بىرلىك تەحنيكا, 12 ءجۇزۋ قۇرالى مەن 107 مۇز جارۋ قۇرىلعىلارى دايىندالىپ, كۇندىز-تۇنگى كەزەكشىلىكتەر جوسپارلانۋدا. قوسىمشا 90 باقىلاۋ بەكەتى اشىلماق.
– قازىر ەڭ قاۋىپتى جەرلەر انىقتالىپ جاتىر. سۋ تاسقىنىنىڭ الدىن الۋ باعىتىنداعى بارلىق جۇمىستاردى پىسىقتاۋدامىز. 41 ەلدى مەكەنگە قاۋىپ تۋدىراتىن 20 گيدروتەحنيكالىق قۇرىلعىلاردىڭ ساپاسى سىن كوتەرمەيدى. ولار باقىلاۋعا الىندى. بۇعان دەيىن وبلىستاعى سۋ تاسقىنى قاۋپى 3 دەڭگەيگە, ياعني, جاسىل, سارى, قىزىل دەپ بولىنسە, بيىل بارلىعىندا قاۋىپ دەڭگەيى قىزىل ءتۇستى, – دەيدى وبلىستىق توتەنشە جاعدايلار جونىندەگى دەپارتامەنت باستىعى الەكسەي سوۆەتوۆ.
وبلىستىڭ 10 اۋدانى, ياعني ءوڭىردىڭ باسىم بولىگىندە مۇز جارۋ جۇمىستارى جوسپارلانۋدا. سينوپتيكتەر اقپان, ناۋرىز ايلارىندا ءبىر تاۋلىكتە ءبىر ايلىق جاۋىن-شاشىن ءتۇسۋى مۇمكىن دەپ بولجاپ وتىر.
–ەگەر وبلىستاعى وزەن باسسەيندەرى تۋرالى ايتار بولساق قار مولشەرى وتكەن جىلدارمەن سالىستىرعاندا 2-3 ەسەگە كوپ. ەسىل, سىلەتى, جاباي, نۇرا وزەندەرىنەن سۋ تاسقىنى قاۋپى بار,– دەيدى «قازگيدرومەت» كاسىپورنى اقمولا فيليالىنىڭ ديرەكتورى باقىت ماقاجانوۆا.
وتكەن جىلى سۋ تاسقىنىنىڭ الدىن الۋ توتەنشە جاعدايلار قىزمەتى قايىق, جولاۋشىلار تاسيتىن ۋاز كولىگى, وزگە دە قاجەتتى تەحنيكالارمەن جابدىقتالعان. بيىل جول تالعامايتىن كولىك پەن قۇتقارۋ قايىقتارى الىندى. 5 سۋ قويماسىنا 39 ميلليونعا جۋىق تەڭگەنىڭ جوبالاۋ-سمەتالىق قۇجاتى ازىرلەنۋدە.
– ەگەر 2019 جىلى توتەنشە جاعدايلار دەپارتامەنتىنىڭ ماتەريالدىق-تەحنيكالىق جاراقتانۋىنا 124 ميلليون تەڭگە بولىنسە, بيىل وبلىستىق اكىمشىلىك بيۋدجەتىنەن 210 ميلليون 670 مىڭ تەڭگە باعىتتالىپ وتىر. بۇل قاراجاتتىڭ ىشىنەن 40 ميلليون تەڭگەسى مۇز جارۋ جۇمىستارىنا جۇمسالادى. , سونداي-اق, بيىل جاقسى اۋدانىنا قاراستى چاپاەۆ سۋ بوگەتى جوندەلمەك, – دەيدى وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ جەتەكشىسى قانات دۇزەلباەۆ.
اۋا رايىن بولجاۋ ورتالىعىنىڭ ماماندارى جاپپاي قار ەرۋ كەزەڭى 21 ناۋرىزدان 10 ءساۋىر ارالىعىندا بولۋى مۇمكىن دەگەن بولجام ايتۋدا.