قورعانىس مينيسترلىگى قارۋلى كۇشتەردىڭ قاجەتتىلىگىن ەسكەرە وتىرىپ, پەتروپاۆل اۋىر ماشينا جاساۋ زاۋىتىمەن جانە س.م. كيروۆ اتىنداعى زاۋىتپەن بىرگە كەلەشەكتەگى ارنايى ءونىمدى ءوندىرۋ مۇمكىندىكتەرىن قاراستىرۋدا. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.
سولتۇستىك قازاقستان وبلىسىنا جۇمىس ساپارى بارىسىندا قورعانىس ءمينيسترى نۇرلان ەرمەكباەۆ اتالعان زاۋىتتار جۇمىسىمەن تانىسىپ, كاسىپورىندار باسشىلىعىمەن كەزدەستى. وندا وندىرىستىك قۋات جۇكتەمەسىن جانە ءونىم جەتكىزۋدى ارتتىرۋ ماسەلەلەرى تالقىلاندى. پامجز – ارنايى ءونىمنىڭ, كوپبەيىندى وندىرىستىك قۋاتى بار مۇناي-گاز, ەنەرگەتيكالىق جانە تەمىر جول جابدىعىنىڭ قازاقستاندىق ءوندىرۋشىسى سانالادى.
س.م. كيروۆ اتىنداعى زاۋىت ەلەكترتەحنيكالىق ءونىمنىڭ, بايلانىس قۇرالدارىنىڭ, قاۋىپسىزدىك جۇيەلەرى مەن ارنايى ماقساتتاعى ءونىمنىڭ وندىرىسىنە ماماندانادى.
ودان باسقا, پەتروپاۆلعا جۇمىس ساپارى شەڭبەرىندە قورعانىس مينيسترلىگى, سولتۇستىك قازاقستان وبلىسى اكىمدىگى مەن «جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگى اراسىندا جاستاردى اسكەري-پاتريوتتىق تاربيەلەۋ سالاسىنداعى ىنتىماقتاستىق پەن ءوزارا ءىس-قيمىل تۋرالى مەموراندۋمعا قول قويىلدى.
اتالعان مەموراندۋم بىرلەسكەن ءىس-شارالاردى, باعدارلامالار مەن جوبالاردى ىسكە اسىرۋعا, اسكەري-پاتريوتتىق تاربيە سالاسىندا اقپارات پەن تاجىريبە الماسۋعا مۇمكىندىك بەرەدى.
سونىمەن قاتار, قورعانىس ءمينيسترى 2019 جىلعى كۇزدە ارىس قالاسىنداعى توتەنشە جاعداي سالدارىن جويۋ كەزىندە قازا تاپقان مايور اقىشەۆتىڭ اتا-اناسىمەن كەزدەستى. ول مارقۇمنىڭ وتباسى مەن جاقىندارىنا كوڭىل ايتىپ, اكەسىنە ءى-ءشى دارەجەلى «ەل قورعانى» مەدالىن تابىس ەتتى.
ەستەرىڭىزگە سالا كەتەيىك, «ەل قورعانى» ۆەدومستۆولىق مەدالى 2017 جىلدان باستاپ ۇلگىلى قىزمەتى مەن مەملەكەت قورعانىسىنا سالماقتى ۇلەس قوسقان اسكەري قىزمەتشىلەرگە بەرىلەدى.