پەتروپاۆلعا نۇرلان ەرمەكباەۆ جۇمىس ساپارىمەن كەلدى

وبلىس اكىمدىگىنىڭ عيماراتىندا ول وبلىس اكىمى قۇمار اقساقالوۆپەن «جاس سارباز» بالالار مەن جاسوسپىرىمدەردىڭ اسكەري-پاتريوتتىق تاربيە جونىندەگى قوعامدىق بىرلەستىگى بويىنشا ىنتىماقتاستىق جاساۋ جونىندەگى مەموراندۋمعا قول قويدى.  مۇنداي بىرلەستىكتەر ەلباسى ن.نازارباەۆتىڭ باستاماسىمەن رەسپۋبليكا بويىنشا قۇرىلعان ەدى. قازىر جالپى سانى 200 مىڭداي تاربيەلەنۋشىسى بار 6535 كلۋب جۇمىس ىستەيدى ەكەن. سونىڭ ىشىندە سولتۇستىك قازاقستان وبلىسىندا جۇمىس ىستەيتىن 315 كلۋب پەن سىنىپتارداعى جاسوسپىرىمدەردىڭ وتان قورعاۋعا دەگەن دايىندىعى رەسپۋبليكا بويىنشا الدىڭعى قاتارداعىلاردىڭ ءبىرى بولىپ وتىرعان كورىنەدى. بۇل تۋرالى مەموراندۋمعا قول قويار الدىنداعى شاعىن سوزىندە وبلىس اكىمى ق.اقساقالوۆ اتاپ ءوتتى. ء«بىزدىڭ وڭىرىمىزدەن قوجابەرگەن جىراۋداي قولباسى ساردار, اعىنتاي, تىلەۋكە سياقتى باتىرلار شىققان. بۇگىنگى ۇرپاق ولاردىڭ ەرلىگىن وقىپ-زەرتتەپ, وزدەرىنە ۇلگى ەتەدى» دەدى ول. 

قورعانىس ءمينيسترى ن.ەرمەكباەۆ ءوزىنىڭ سوزىندە سولتۇستىكقازاقستاندىق جاستاردىڭ جەرگىلىكتى بيلىكتىڭ قولداۋى ارقاسىندا وتانسۇيگىشتىك سەزىمدەرىنىڭ جوعارى ەكەندىگى كورىنىپ جۇرگەنىن ءتۇرلى سايىستار مەن كونكۋرستاردان جاقسى بىلەتىنىن اتاپ ءوتتى. «جاس سارباز» جاسوسپىرىمدەردىڭ اسكەري-پاتريوتتىق قوزعالىسىنا قاتىسۋشىلاردىڭ العان بىلىمدەرى مەن تاجىريبەلەرى ولاردىڭ كەيىنگى ومىرىندە پايداسىن تيگىزەتىنىن بىلەمىز. بولاشاقتاعى وقۋىندا دا, قىزمەتىندە دە, بيزنەس سالاسىندا دا وسىندا العان تاربيەلەرى پايداسىن تيگىزەدى» دەدى مينيستر ءوز سوزىندە.

وسىدان كەيىن قورعانىس ءمينيسترى پەتروپاۆلدىڭ «كيروۆ اتىنداعى زاۋىتىنا» بارىپ, ونىڭ ونىمدەرىمەن تانىستى. مۇندا وعان كاسىپورىننىڭ باس ديرەكتورى ا.ارعىمباەۆ تۇسىنىكتەمە بەردى. سودان سوڭ ن.ەرمەكباەۆ «پزتم» زاۋىتىنا جانە قورعانىس مينيسترلىگىنىڭ اسكەري-تەحنيكالىق مەكتەبىنە بارىپ, ولاردىڭ جۇمىسىمەن تانىستى.