كۇشەيتىلگەن رەجىمدە جالعاستىرۋدى تاپسىردى

دەنساۋلىق ساقتاۋ ءمينيسترى ەلجان ءبىرتانوۆتىڭ بەرگەن مالى­مەتى بويىنشا, بۇگىنگى تاڭدا قا­زاق­ستاندا كوروناۆيرۋستىق ينفەك­تسيا­مەن سىرقاتتانۋ جاعداي­لارى تىر­كەلمەگەن. قحر-مەن مەملە­كەت­تىك شەكارا ارقىلى بارلىق وتكى­زۋ پۋنكتتەرىندە سانيتار­لىق-ەپي­دەميولوگيالىق باقىلاۋ جۇمىس­تارى جالعاسۋدا, ونىڭ بارى­سىندا وسى جىلدىڭ 6 قاڭتارى­نان باستاپ 21,8 مىڭ ادام قارالدى.

«وسى جىلدىڭ 5 اقپانىنداعى جاعداي بويىنشا 104 ادام جوعارى تەم­پەراتۋرامەن اۋرۋحاناعا جاتقى­زىلدى, ولاردىڭ 71-ءى بۇگىن­دە اۋرۋحانادان شىعارىلعان. ستا­تسيو­نارلاردا 33 ادام قالىپ وتىر, بارلىعىنا كوروناۆيرۋسقا قاتىس­تى زەرتتەۋ جۇرگىزىلدى – ناتيجەلەرى تەرىس», دەدى ە.ءبىرتانوۆ.

سونداي-اق تاياۋدا ۋحان قالا­سىنان ەۆاكۋاتسيالانعان 83 وتانداسىمىز كارانتينگە جاتقىزىلعان ەدى. زەرتحانالىق تەكسەرۋلەر ەلگە ورالعانداردىڭ بويىندا دا كوروناۆيرۋستىق ينفەكتسيانىڭ جوق ەكەنىن انىقتادى.

ءوز كەزەگىندە سىرتقى ىستەر ءمي­نيسترىنىڭ ءبىرىنشى ورىنباسارى شاحرات نۇرىشەۆ قازىرگى تاڭدا قحر اۋماعىندا قازاقستاننىڭ 780 ازاماتى, ونىڭ ىشىندە 559 ستۋدەنتى جۇرگەنىن حابارلادى. قازاقستانعا جەتكىزۋ تۋرالى 427 ادام ءوتىنىش بەرگەن, قالعاندارى قحر-دا قالۋعا نيەت بىلدىرگەن. سىرتقى ساياسي ۆەدومستۆو ديپلوماتيالىق ارنالار ارقىلى ازاماتتارىمىزدى ەلگە اكەتۋدى ۇيىمداستىرۋ مۇمكىندىگىن پىسىقتاپ جاتىر.

وسى جىلدىڭ 3 اقپانىنان باستاپ قحر رەيستەرىنە بيلەتتەرى بار جولاۋشىلارعا اۆيابيلەتتەردى ساتىپ الۋ ورنى بويىنشا قايتارۋ نەمەسە قايتا رەسىمدەۋ جۇزەگە اسىرىلۋدا. بۇل جاعدايدا پروبلەما جوق, دەپ سەندىردى يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆ.

سونداي-اق كوميسسيا وتىرى­سىندا اتقارىلىپ جاتقان جۇ­مىس­تار تۋرالى ىشكى ىستەر ۆيتسە-ءمينيسترى ا.كالايچيدي, باس مەم­لەكەتتىك سانيتارلىق دارىگەر ج.بەكشين, الماتى, شىعىس قازاق­ستان وبلىستارى, نۇر-سۇل­تان جانە الماتى قالالارى اكىم­دە­رىنىڭ ورىنباسارلارى باياندادى.

كەڭەستى قورىتىندىلاي كەلە, بەردىبەك ساپارباەۆ كورونا­ۆي­رۋس­تىڭ پايدا بولۋى مەن تارالۋى­نا جول بەرمەۋ بويىنشا بىر­قاتار ناقتى مىندەتتى بەلگى­لەپ, بارلىق قىزمەتتەردىڭ جۇمىس­تى كۇشەيتىلگەن رەجىمدە جالعاس­تىرۋى قاجەت ەكەنىن اتاپ ءوتتى.