فۋتزالدان چەحيانىڭ برنو قالاسىندا ءوتىپ جاتقان الەم چەمپيوناتىنىڭ توپتىق ءتۋرنيرىنىڭ تۇساۋكەسەر كەزدەسۋىندە قازاقستان قۇراماسى ويدا-جوقتا رۋمىنياعا 1:3 ەسەبىمەن ەسە جىبەرگەن ەدى.
جارىس كەستەسىندەگى جاعدايدى تۇزەۋ ءۇشىن كەلەسى باسەكەدە جەرلەستەرىمىزگە كوپ تەر توگۋگە تۋرا كەلدى. ءبىرىنشى كەزەڭدە البەرت اقبالىقوۆ ءبىزدىڭ كوماندانى العا شىعاردى.
ۇزىلىستەن كەيىن سلوۆەنيالىقتار قارقىندارىن كۇرت كۇشەيتىپ, 28 جانە 31 مينۋتتاردا نىسانى ءدال كوزدەدى. بۇل گولداردىڭ اۆتورلارى – ماتەي فيدەرشاك پەن الەن فەتيچ. 32 مينۋتتا دۋگلاس ەسەپتى تەڭەستىردى. كوپ كەشىكتەي كريستيان چۋەتس قارت قۇرلىق وكىلدەرىن تاعى ءبىر قۋانتتى. الايدا وسى ماتچتا قالاي دا جەڭىسكە جەتۋدى ماقسات تۇتقان قازاقستان قۇراماسى ۇزدىكسىز شابۋىلدار ۇيىمداستىرىپ, كوزدەگەن ناتيجەلەرىنە قول جەتكىزدى. 38 مينۋتتا لەو جانە كەزدەسۋدىڭ اياقتالۋىنا 35 سەكۋند قالعاندا داۋرەن تۇرساعۇلوۆ مەرگەندىك تانىتتى. قورىتىندى ەسەپ – 4:3.
ەرتەڭ وتانداستارىمىز چەحيامەن كۇش سىناسادى. قازىرگى كەزدە ولار التى ۇپايمەن كوش باستاپ تۇر. رۋمىنيا مەن قازاقستاننىڭ قورجىنىندا ءۇش-ءۇش ۇپايدان بار. ال سلوۆەنيا سوڭعى ساتىعا جايعاستى.