ءا.ا. سمايىلوۆ الماتىداعى ەۋرازيالىق ەكونوميكالىق كوميسسيا كەڭەسىنىڭ كەزەكتى وتىرىسىنا قاتىستى. بۇل تۋرالى قارجى مينيسترلىگىنىڭ ءباسپاسوز قىزمەتى حابارلادى.
وتىرىس بارىسىندا ەاەو ودان ءارى دامۋى جونىڭدە بىرقاتار وزەكتى ماسەلەلەر قارالدى. ونىڭ ىشىندە كەدەندىك جانە تەحنيكالىق رەتتەۋ, ساۋدا, ءدارى-دارمەكتەردىڭ ورتاق نارىعىن دامىتۋ جانە وداققا مۇشە ەلدەردىڭ اقپاراتتىق تەحنولوگيالار پروتسەستەرى سالاسىنداعى ىنتىماقتاستىعى ماسەلەلەرى بار.
وتىرىسقا قاتىسۋشىلار 2025 جىلعا دەيىنگى ەۋرازيالىق ينتەگراتسيانى دامىتۋدىڭ ستراتەگيالىق باعىتتارىن ايقىندايتىن قۇجاتتىڭ دايىندىق بارىسىن تالقىلادى.
كۇن تارتىبىندەگى ماڭىزدى ماسەلە ەاەو ىشكى نارىعىنداعى كەدەرگىلەردى جويۋ بويىنشا وداققا مۇشە مەملەكەتتەر تاراپىنان اتقارىلعان جۇمىستى تالقىلاۋ. قازاقستاندىق تاراپ تاعى ءبىر رەت ەاەو سەرىكتەستەرىنىڭ نازارىن كەدەرگىلەردى جويۋدىڭ قازىرگى ءتارتىبىن تۇبەگەيلى قايتا قاراۋ قاجەتتىگىنە اۋداردى.
تاراپتار ءوزارا مەملەكەتتىك ساتىپ الۋلارعا قاتىسۋ كەزىندە بانكتىك كەپىلدەمەلەردى مويىنداۋ ماسەلەسىن تالقىلادى. ماسەلەن, ەگەر قازاقستان ەاەو بارلىق ەلدەرىنىڭ بانكتىك كەپىلدەمەلەرىن قابىلدايتىن بولسا, رەسەيدە مەملەكەتتىك ساتىپ الۋلار راسىمدەرىنە قاتىسۋعا تەك رەسەي بانكتەرىنىڭ بانك كەپىلدەمەلەرى قابىلدانادى. «قازاقستان ەۋرازيالىق دامۋ بانكى بەرەتىن بانكتىك كەپىلدىكتەردى ءبىرىنشى ساتىدان-اق تانۋ مۇمكىندىگىن قاراستىرۋ جونىڭدەگى ەۋرازيالىق ەكونوميكالىق كوميسسيانىڭ ۇسىنىسىن قولدايدى», دەدى اليحان سمايىلوۆ. ول قازاقستاندىق تاراپ بانكتىك كەپىلدەمەلەردى ءوزارا تانۋ تۋرالى كەلىسىمدى دايىنداۋ بويىنشا جۇمىستى جالعاستىرۋعا شاقىراتىنىن اتاپ ءوتتى.