يۋنەسكو جانە يسەسكو ىستەرى جونىندەگى ۇلتتىق كوميسسيانىڭ وتىرىسى ءوتتى

وتىرىسقا كوميسسيانىڭ تۇراقتى مۇشەلەرى – مۇددەلى مەملەكەتتىك ورگانداردىڭ باسشىلارى, ءبىلىم, عىلىم جانە مادەنيەت قايراتكەرلەرى قاتىستى. 

سوڭعى ەكى جىلدىڭ قورىتىندىسىنا ساي كوميسسيا, ونىڭ تاقىرىپتىق كوميتەتتەرى مەن يۋنەسكو كلۋبتارى جانە قاۋىمداسقان مەكتەپتەرىنىڭ جۇمىسى باياندالدى. اتاپ ايتقاندا, قازاقستاننىڭ تاعى ەكى ۇلتتىق پاركى – شارىن جانە جوڭعار الاتاۋى يۋنەسكو-نىڭ دۇنيەجۇزىلىك بيوسفەرالىق رەزەرۆاتتار جەلىسىنە ەنگىزىلدى. ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك ءتىزىمى «قورقىت مۇراسى» جانە «قازاق جىلقى وسىرۋشىلەرىنىڭ ءداستۇرلى كوكتەمگى ادەت-عۇرىپتارى – قىمىز مۇرىندىق, بيە بايلاۋ جانە ايعىر قوسۋ» نوميناتسيالارىمەن تولىقتىردى. يۋنەسكو-نىڭ قولداۋىمەن پاريج قالاسىندا « ۇلى دالا: رۋحاني مۇرا جانە ونىڭ الەمدىك تاريحقا ۇلەسى» حالىقارالىق فورۋم ءساتتى وتكىزىلدى.

قازاقستان رەسپۋبليكاسى يۋنەسكو-نىڭ «ادام جانە بيوسفەرا» باعدارلاماسىنىڭ حالىقارالىق ۇيلەستىرۋ كەڭەسىنە, ال قازاقستاندىق سالالىق ۇلتتىق كوميتەتتىڭ باسشىسى ر. ياششەنكو بيوسفەرالىق رەزەرۆاتتار جونىندەگى كەڭەسشىلەردىڭ حالىقارالىق كوميتەتى قۇرامىنا تاعايىندالدى. 

سىرتقى ىستەر ءمينيسترىنىڭ ورىنباسارى – ۇلتتىق كوميسسيا توراعاسىنىڭ ورىنباسارى ەرجان اشىقباەۆ يۋنەسكو-نىڭ الەۋمەتتىك-مادەني سالاداعى مىندەتتەردى شەشۋدە قازاقستاننىڭ ماڭىزدى سەرىكتەسى بولىپ قالا بەرەتىنىن, سونداي-اق مادەنيەت, عىلىم, ءبىلىم, اقپاراتتىق تەحنولوگيالار سالاسىنداعى ۇلتتىق جەتىستىكتەردى ناسيحاتتاۋدا بىرەگەي پلاتفورما سانالاتىنىن اتاپ ءوتتى. 

وتىرىس بارىسىندا قاتىسۋشىلار كوميسسيانىڭ 2020 جىلعا ارنالعان قىزمەتىنىڭ باسىم باعىتتارىن تالقىلادى, ونىڭ ىشىندە يۋنەسكو-نىڭ دۇنيەجۇزىلىك مۇرا جانە ماتەريالدىق ەمەس مۇرا تىزىمىنە جاڭا ۇلتتىق نوميناتسيالاردى دايىنداۋ جانە ىلگەرىلەتۋ ماسەلەلەرىن قاراستىردى. 

كوميسسيا مۇشەلەرى وسى جىلى يۋنەسكو-نىڭ اتاۋلى مەرەيتويلار كۇنتىزبەسىنە ەنگىزىلگەن ءال-ءفارابيدىڭ 1150 جىلدىعى مەن شىمكەنتتىڭ 2200 جىلدىعىن اتاپ ءوتۋ ماسەلەسىن تالقىلاۋعا ەرەكشە نازار اۋداردى.