بۇگىن ماجىلىستە پالاتا توراعاسىنىڭ ورىنباسارى گۇلميرا يسيمباەۆانىڭ توراعالىعىمەن دەپۋتاتتاردىڭ قاڭتارداعى وڭىرلەردە كەزدەسۋ بارىسىندا سايلاۋشىلاردىڭ كوتەرگەن ماسەلەلەرى بويىنشا ۇكىمەت مۇشەلەرىمەن كەزدەسۋى ءوتتى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
گۇلميرا يستايبەقىزى اتاپ وتكەندەي, مۇنداي كەزدەسۋلەر پارلامەنت ماجىلىسىندە داستۇرگە اينالىپ كەلەدى. ەلباسى نۇرسۇلتان ءابىش ۇلى نازارباەۆتىڭ تاپسىرمالارىنا سايكەس بيىلعى جىلعى كەزدەسۋلەر جاڭا فورماتتا ۇيىمداستىرىلدى.
كەزدەسۋ وتكىزىلەتىنى تۋرالى بۇقارالىق اقپارات قۇرالدارى ارقىلى, الەۋمەتتىك جەلىلەر ارقىلى الدىن الا حابار بەرىلدى. ناتيجەسىندە وتكەن جىلدىڭ قاڭتارداعى كەزدەسۋلەرىمەن سالىستىرعاندا, بيىل كەزدەسۋلەر سانى ەكى ەسەگە ۇلعايىپ, قاتىسۋشىلار سانى ءبىر جارىم ەسەگە كوبەيگەن. تۇرعىندار كوتەرگەن ماسەلەلەردىڭ ىشىندە ەڭ كوبى الەۋمەتتىك سالاعا قاتىستى. ماسەلەن, تۇرعىن ۇيمەن قامتاماسىز ەتۋ, اتاۋلى الەۋمەتتىك كومەك الۋعا ۇمىتكەر وتباسىلارعا قويىلاتىن ولشەمشارتتار, جاستاردى, اسىرەسە اۋىل جاستارىن جۇمىسپەن قامتۋ, مىندەتتى الەۋمەتتىك مەديتسينالىق ساقتاندىرۋدى ەنگىزۋ باسقا سۇراقتار كەڭىنەن كوتەرىلگەن.
كەزدەسۋگە وسى تاقىرىپتار توڭىرەگىندە ماسەلەلەرگە جاۋاپتى مەملەكەتتىك ورگان وكىلدەرى كەلدى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ جانە مەملەكەت باسشىسى قاسىم-جومارت كەمەل ۇلى توقاەۆتىڭ تاپسىرمالارى شەڭبەرىندە پارلامەنت قابىلداعان زاڭداردىڭ ىسكە اسىرىلۋ بارىسى تۋرالى ءسوز العان پرەمەر-ءمينيستردىڭ ورىنباسارى بەردىبەك ساپارباەۆ 2019 جىلى ەكونوميكانىڭ دامۋ قارقىنى وتكەن 2018 جىلمەن سالىستىرعاندا 4,5 پايىزدى قۇراعانىن ايتتى. قازاقستاننىڭ تاريحىندا بىلتىرعى جىلى ءبىرىنشى رەت 13 ميلليون شارشى مەتر تۇرعىن ءۇي بەرىلىپ, 95 مىڭ جەرلەستەرىمىز تۇرعىن ۇيمەن قامتاماسىز ەتىلدى.
وتكەن جىلى ەڭ تومەنگى جالاقى 1,5 ەسەگە, ال مەملەكەتتىك قىزمەتكەرلەردىڭ جالاقىسى ورتا ەسەپپەن 30 پايىزعا ءوستى. قازاقستاندىقتاردىڭ قارىزدارى مەن ايىپپۇلدارىن كەشىرۋ ءۇشىن بيۋدجەتتەن قوسىمشا 147 ميلليارد تەڭگە بولىنگەن. ودان ءارى بەردىبەك ساپارباەۆ الەۋمەتتىك تولەمدەرگە دە كەڭىنەن توقتالدى. دەپۋتاتتار وڭىرلەردى تۇرعىندار كوتەرەگن ماسەلەلەردى ۇكىمەت مۇشەلەرىنىڭ نازارىنا ۇسىندى. ماسەلەن, دەپۋتات باقىتگۇل حامەنوۆا 2,4 ميلليارد تەڭگەنى قۇراعان اتاۋلى الەۋمەتتىك كومەكتىڭ ارتىق تولەمى تۋرالى قوزعادى, بۇل ءوز كەزەگىندە جالپى ەلدى مەكەندەردەگى الەۋمەتتىك شيەلەنىسكە الىپ كەلۋى ابدەن ىقتيمال دەي كەلىپ, ارتىق تولەنگەن سومالاردى قايتارۋ ماسەلەسىندە قانداي شارالار قابىلدانىپ جاتقانىن سۇرادى.
ءوز كەزەگىندە ۇكىمەت جەتەكشىسىنىڭ ورىنباسارى ءبىز بارلىعىن تەكسەردىك. 75 مىڭ وتباسى ءوزىنىڭ تابىستارىن جاسىرعان. قازىرگى تاڭدا ءبىز 500 ميلليونداي تەڭگەنى بيۋدجەتكە قايتاردىق,-دەدى. ال, دەپۋتات فاحريددين قاراتاەۆ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆكە ءبىر, ەكى, ءۇش بالالارى بار وتباسىلارعا اي سايىن الەۋمەتتىك تولەمدەر تولەۋ نەمەسە قانداي دا ءبىر كومەك كورسەتۋ جوسپارى بار ما دەگەن سۇراقتى العا تارتقاندا, مينيستر: ءبىزدىڭ دە كەزدەسۋلەردە حالىق بۇل سۇراقتى قويىپ جاتىر. ءبىز اتاۋلى الەۋمەتتىك كومەككە ەمەس كوپبالالى جانۇيالارعا جاڭادان جاردەماقى ەنگىزدىك. قازىر 370 مىڭ جانۇيا الىپ جاتىر. سونىڭ ىشىندە از قامتىلعانى – 125 مىڭ جانۇيا. ءۇش ەسە ارتىق. ءبىر, ەكى, ءۇش بالالى از قامتىلعان جانۇيالاردىڭ سانى 190 مىڭ, ال قازاقستان بويىنشا 2 ميلليون 904 تابىسسىز جانۇيا, ءبىر, ەكى, ءۇش بالاسى بار. بۇل 15 ەسە كوپ. سوندىقتان ول 15 ەسە ارتىق قاراجاتتى تالاپ ەتەدى. ەكىنشىدەن, باسقا داۋلەتتى, جاعدايى جاقسى كىسىلەرگە دە وسى جاردەماقىنى تولەۋ كەرەك پە, جوق پا – ول دا ۇلكەن سۇراق. سوندىقتان ءبىز ءازىر ەشقانداي شەشىمگە كەلگەن جوقپىز, بىراق ونىڭ ءبارىن قاراپ جاتىرمىز, دەدى. ودان ءارى دەپۋتاتتار زەينەتاقى تولەمى, ساياجاي تۇرعىندارىنىڭ ماسەلەسى, تۇرعىن ۇيمەن قامتاماسىز ەتۋ, جاعدايى تومەن وتباسىلارعا كومەكتەسۋگە قاتىستى كوپتەگەن سۇراقتاردى كوتەردى.
كەزدەسۋگە ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ, ءبىلىم جانە عىلىم ۆيتسە-ءمينيسترى شولپان كارينوۆا, دەنساۋلىق ساقتاۋ ۆيتسە-ءمينيسترى ءلاززات اقتاەۆا, مادەنيەت جانە سپورت ۆيتسە-ءمينيسترى نۇرعيسا داۋەشوۆ, اقپارات جانە قوعامدىق دامۋ ۆيتسە-ءمينيسترى عابيدوللا وسپانقۇلوۆ, پرەمەر-ءمينيسترى كەڭسەسى باسشىسىنىڭ ورىنباسارى ەرمەك امانشاەۆ, يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ, قارجى ۆيتسە-ءمينيسترى تاتيانا ساۆەلەۆا, ەنەرگەتيكا ۆيتسە-ءمينيسترى جۇماباي قاراعاەۆ, ەكولوگيا, گەولوگيا جانە تابيعي رەسۋرستار ۆيتسە-ءمينيسترى احمەتجان پىرىمقۇلوۆ جانە تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى ازامات باتىرقوجا قاتىسىپ, تەسىلى سۇراقتارعا جاۋاپ بەردى.
جالپى مەجەلى ۋاقىت ىشىندە 20-دان استام دەپۋتات 50 گە جۋىق سۇراق قويىپ ۇلگەردى.