قازاقستان رەسپۋبليكاسى پارلامەنتىنىڭ سەناتىندا پالاتا توراعاسىنىڭ ورىنباسارى اسقار شاكىروۆتىڭ توراعالىق ەتۋىمەن جەرگىلىكتى وكىلدى ورگاندار ءوزارا ءىس-قيمىل جونىندەگى كەڭەستىڭ كەزەكتى وتىرىسى بولدى. جۇزدەسۋگە قازاقستان زاڭگەرلەر وداعىنىڭ وكىلدەرى قاتىستى. بۇل جايىندا پارلامەنت سەناتىنىڭ ءباسپاسوز قىزمەتى حابارلادى.
قۇقىقتىق ءبىلىمنىڭ جۇرتشىلىق اراسىنا كەڭىنەن تارالۋىنا ماڭىز بەرۋ, اتاپ ايتقاندا, مەملەكەت باسشىسىنىڭ قازاقستان حالقىنا جولداۋى مەن ونىڭ سايلاۋالدى تۇعىرناماسىندا, باسقا دا اۋقىمدى مەملەكەتتىك باعدارلامالاردا كوزدەلگەن ءارى ەلىمىزدە جۇزەگە اسىپ جاتقان رەفورمالاردىڭ ءمان-جايىن كاسىبي تۇردە ءتۇسىندىرۋ وتىرىستىڭ كۇن تارتىبىندەگى نەگىزگى ماسەلە بولدى.
وتىرىسقا قاتىسۋشىلار كەيىنگى كەزدە قابىلدانعان زاڭدار, سونداي-اق قازىرگى ۋاقىتتا پارلامەنتتە قارالىپ جاتقان زاڭ جوبالارى تۇرعىنداردىڭ تىنىس-تىرشىلىگىن, ونىڭ ىشىندە الەۋمەتتىك جانە تۇرعىن ۇيمەن قامتاماسىز ەتۋ, دەنساۋلىق ساقتاۋ, ءبىلىم بەرۋ, قوعامدىق ءتارتىپ سالالارىن قامتيتىنىن اتاپ ءوتتى. دەپۋتاتتار اتاپ وتكەندەي, بۇل تۇرعىدا, اسىرەسە, ەلىمىزدىڭ شالعاي وڭىرلەرىندە قۇقىقتىق ءبىلىمدى قارقىندى قولدانۋ قاجەت بولىپ وتىر. زاڭ شىعارۋ جانە قۇقىق قولدانۋ ىسىنە اتسالىساتىن مەملەكەتتىك ۇيىمدار قىزمەتكەرلەرىنىڭ كاسىبي الەۋەتىن ارتتىرۋعا جاردەمدەسۋ قاجەتتىگى دە ايتىلدى.
وتىرىسقا قاتىسۋشىلار وسىندا ايتىلعان ماسەلەلەرگە بايلانىستى ايماقتاردا شارالار وتكىزۋدە جەرگىلىكتى وكىلدى ورگاندارعا جاردەمدەسۋ باستاماسىنا قولداۋ ءبىلدىردى.
وتىرىستىڭ قورىتىندىسى بويىنشا «قازاقستان ءماسليحاتتارى دەپۋتاتتارىنىڭ بىرلەستىگى» جانە «قازاقستان زاڭگەرلەرىنىڭ وداعى» رەسپۋبليكالىق قوعامدىق بىرلەستىكتەرى اراسىنداعى ىنتىماقتاستىق تۋرالى مەموراندۋمعا قول قويىلدى. قۇجات ازاماتتاردىڭ قۇقىقتىق مادەنيەتىن قالىپتاستىرۋعا, حالىق مۇددەسىن جەتكىزۋدە ءماسليحات دەپۋتاتتارى جۇمىسىنىڭ تيىمدىلىگىن كۇشەيتۋگە جانە پارلامەنت قابىلداعان الەۋمەتتىك ماڭىزدى زاڭداردىڭ, سونداي-اق ەلىمىزدىڭ ستراتەگيالىق دامۋ باعدارلامالارىنىڭ نەگىزگى ەرەجەلەرىن تۇسىندىرۋدە ولاردىڭ بىلىكتىلىگىن ارتتىرۋعا باعىتتالعان. قۇجاتقا وسى قوعامدىق بىرلەستىكتەردىڭ باسشىلارى تولەۋبەك مۇقاشەۆ پەن سەرىك اقىلباي قول قويدى.