قازاقستاننىڭ باس سانيتارلىق دارىگەرى جانداربەك بەكشين كوروناۆيرۋستىڭ الدىن الۋ شارالارى بويىنشا اتقارىلىپ جاتقان جۇمىستار مەن اۋرۋ بەلگىلەرى بايقالعان ناۋقاستاردىڭ جاعدايى تۋرالى كۇندەلىكتى بريفينگ وتكىزۋدە.
جۋرناليستەرمەن بۇگىنگى كەزدەسۋىندە ەلىمىزدىڭ باس سانيتارلىق دارىگەرى بۇقارالىق اقپارات قۇرالدارى ارقىلى كاسىپكەرلەرگە ءوتىنىش ءبىلدىردى.
«قازاقستاندا ءداستۇرلى مەديتسينالىق ماسكالاردىڭ 5 وتاندىق ءوندىرۋشىسى بار. قۇرمەتتى وتاندىق مەديتسينالىق ماسكا وندىرۋشىلەر! ءبىز تەك ءدارى-دارمەكتىڭ ەڭ جوعارى باعاسىن رەتتەيمىز. ماسكا باعاسىن رەتتەي المايمىز. سوندىقتان دا ەل ازاماتتارى ءۇشىن قاجەتتى كولەمدە ماسكالار شىعارۋلارىڭىزدى وتىنەمىز» دەدى ول.
جانداربەك بەكشيننىڭ ايتۋىنشا, 6 قاڭتاردان بەرى قىتايدان ەلىمىزگە 12 610 ادام كەلگەن. ونىڭ 12 365-ءى قازاقستان ازاماتى بولسا, 245-ءى – شەتەلدىك. مەديتسينا ماماندارى ولاردىڭ 51,1%-ىنا, اتاپ ايتقاندا, 6 449 ادامعا قوڭىراۋ شالىپ, شاعىمدارىن سۇراپ سويلەسكەن. ولاردىڭ بارلىعىن باقىلاۋ ءۇشىن بۇل جۇمىستىڭ جالعاسا بەرەتىنىن جەتكىزگەن باس سانيتارلىق دارىگەر: «قازىرگى ۋاقىتتا 35 ادام جەكە اۋرۋحاناعا جاتقىزىلىپ, بولەك بولمەلەردە وقشاۋلاندى. ولاردىڭ 22-سىنە جەدەل رەسپيراتورلىق ۆيرۋستىق ينفەكتسيا (جرۆي/ورۆي), 4-ىنە تۇماۋ, بىرەۋىنە تۇماۋ جانە پاراينفليۋتسەنوز دياگنوزى قويىلدى. وسىلايشا, 27 ادامدا ماۋسىمدىق سىرقات انىقتالدى. قالعان 8 ادامدى جانە بۇدان كەيىنگى سىرقاتتاردى باقىلاۋ ءۇشىن سىنامالار الىپ, الماتىداعى ايقىمباەۆ اتىنداعى ۇلتتىق ينفەكتسيالىق عىلىمي ورتالىعىنا جىبەرەمىز. بۇل ورتالىق جاڭا كوروناۆيرۋستى پتر-دياگنوستيكالاۋ ادىستەمەسىن يگەرگەن. قازاقستاندا كوروناۆيرۋس ينفەكتسياسىن بولدىرماۋدىڭ بارلىق رەسۋرستارى بار, سونداي-اق, ءبىز دۇنيەجۇزىلىك دەنساۋلىق ساقتاۋ ۇيىمىمەن جانە رەسەيمەن ءوزارا كاسىبي كومەك تۋرالى كەلىستىك» دەدى.
سونىمەن قاتار ج.بەكشين ءار ايماقتاعى جاعدايعا دا جەكە-جەكە توقتالدى. سپيكەر حايناندا دەمالىپ كەلگەن قىزىلوردالىق ازاماتتىڭ سۋىق تيگىزگەنىن, جامبىلدىق ءبىر پاتسيەنتكە جرۆي دياگنوزى قويىلعانىن, ال الماتىداعى ناۋقاستاردىڭ جاعدايى وڭالعاندىقتان, جاقىندا ۇيلەرىنە قايتاتىنىن ايتتى.
دۇنيەجۇزىلىك دەنساۋلىق ساقتاۋ ۇيىمى قىتاي مەملەكەتى ەپيدەميانىڭ الدىن الۋعا قابىلەتتى ەكەندىگىنە سەنىمدى. حالىقارالىق ۇيىم الەم ەلدەرىنە ءوز ازاماتتارىن قىتايدان ەۆاكۋاتسيالاۋعا كەڭەس بەرمەيدى, ويتكەنى ولار حالىقارالىق قاۋىمداستىقتى سابىرلى بولۋعا جانە بولىپ جاتقان وقيعالارعا شامادان تىس رەاكتسياعا جول بەرمەۋگە شاقىرادى. وسىنى ايتقان ج.بەكشين مادەنيەت جانە سپورت مينيسترلىگى مەملەكەتتىك قىزمەتشىلەردىڭ ءىس-ساپارلارىن شەكتەيتىن قاۋلى شىعارىپ, بارلىق حالىقارالىق بۇقارالىق سپورتتىق جارىستار كەيىنگە قالدىرىلعانىن جانە قىتايدا تەمىرجول جولاۋشىلار تاسىمالى توقتاتىلعانىن اتاپ ءوتتى.