ەلوردادا «ەلەكتر ەنەرگەتيكاسىن دامىتۋ جانە ەنەرگيا ۇنەمدەۋ ينستيتۋتى» اق وكىلدەرى سلوۆاكيا ەلىنىڭ ADRIAN Group جانە Market Solution جشس باسشىلىعىمەن كەزدەسىپ, تاراپتار ەنەرگيا ۇنەمدەۋ سالاسىندا ۇشجاقتى مەموراندۋمعا قول قويدى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
ءوزىنىڭ كىرىسپە سوزىندە ينستيتۋتتىڭ باسقارما توراعاسى باۋىرجان سماعۇلوۆ مەملەكەتتىك ەنەرگەتيكالىق ءتىزىلىم سۋبەكتىلەرىنىڭ كاسىپورىندارىندا سلوۆاك تەحنولوگيالارىن ەنگىزۋگە كومەك كورسەتۋگە دايىندىعىن ءبىلدىردى. بۇگىنگى تاڭدا مەملەكەتتىك ەنەرگەتيكالىق ءتىزىلىم ءجىو ەنەرگيا سىيىمدىلىعىن تومەندەتۋگە باعىتتالعان باستى تەتىك بولىپ تابىلادى.
«قازاقستاننىڭ ستراتەگيالىق جوسپارىندا ەلىمىزدىڭ ءجىو-ءنىڭ ەنەرگيا سىيىمدىلىعىن 2025 جىلعا قاراي كەمىندە 25%-عا تومەندەتۋ جونىندەگى مىندەت ايقىندالدى. بۇل رەتتە تاۋەلسىزدىك كەزەڭىندە ءجىو ەنەرگيا سىيىمدىلىعى 56%-عا تومەندەسە, بۇل كەزەڭدە الەمدىك ەكونوميكانىڭ ەنەرگيا سىيىمدىلىعى 26%-عا تومەندەدى» دەدى باۋىرجان سماعۇلوۆ.
قازاقستان ەكونوميكاسىنىڭ دامۋىمەن ەنەرگورەسۋرستارعا دەگەن قاجەتتىلىك تەك قانا وسۋدە. قازاقستانداعى ەنەرگيا رەسۋرستارىن نەگىزگى تۇتىنۋ ونەركاسىپ سالاسىنا تيەسىلى, ەلەكتر ەنەرگياسىنىڭ 67%-ى ءىرى ونەركاسىپ تۇتىنۋشىلارىنا قاتىستى.
ءوز كەزەگىندە, تابيعي جانە سۇيىتىلعان گازدا جۇمىس ىستەيتىن سلوۆاك تەحنولوگيالارى باتىس ەلدەرىنىڭ كوپتەگەن ءىرى كاسىپورنىندا وزدەرىنىڭ تيىمدىلىگىن ءىس جۇزىندە دالەلدەگەن. ولار ۇلكەن عيماراتتاردا تەمپەراتۋرا رەجىمىن ساقتاي الادى. قازىرگى زامانعى تەحنولوگيالار ەلەكتر ەنەرگياسىنا جۇمسالاتىن شىعىنداردى 50-دەن 70%-عا دەيىن ۇنەمدەۋگە مۇمكىندىك بەرەدى, بۇل جوبالاردىڭ وتەلۋ مەرزىمدەرىنە وڭ اسەر ەتەدى. الداعى ۋاقىتتا ورتالىق ءوڭىردى گازداندىرۋ جايىن ەسكەرەتىن بولساق, تاراپتار قاراعاندى وبلىسىنىڭ, ونىڭ ىشىندە جەزقازعان قالاسىنىڭ الەۋەتىن زەرتتەۋگە كەلىستى.
سونىمەن قاتار تاراپتار تاجىريبە الماسۋدى, اقپاراتتىق حاباردارلىقتى ارتتىرۋدى, قارجىلىق ينۆەستيتسيالاردى تارتۋعا جانە باسقا دا بىرقاتار ماسەلەگە باعىتتالعان ماڭىزدى بىرلەسكەن ءىس-شارالاردى اتقارۋدى جوسپارلاپ وتىر.
ايتا كەتۋ كەرەك, قازىرگى تاڭدا شارۋاشىلىقتىڭ بارلىق سالالارىندا ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ ماسەلەسىنە ەرەكشە نازار اۋدارىلىپ وتىر. وسىعان بايلانىستى دۇنيەجۇزىلىك بانكپەن حالىقارالىق ىنتىماقتاستىق جولعا قويىلدى, شامامەن 22 ملن اقش دوللارىنا جوبا جۇزەگە اسىرىلۋدا, 78 الەۋمەتتىك ماڭىزى بار نىسان جاڭعىرتىلدى. جوبا ناتيجەسى بويىنشا 270 ملن تەڭگە بيۋدجەت قاراجاتى ۇنەمدەلەتىن بولادى.
سونداي-اق بۇۇ دامۋ باعدارلاماسىمەن بىرلەسىپ, جابدىقتىڭ ەنەرگيا تيىمدىلىگىن سەرتيفيكاتتاۋ جانە تومەن كومىرتەكتى دامۋعا كوشۋ بويىنشا جالپى سوماسى 10 ملن اقش دوللارىن قۇرايتىن 2 جوبا جۇزەگە اسىرىلۋدا.