ۋحان ماڭىنداعى قالادا قىتاي بيلىگى ۋادە ەتكەن العاشقى كوروناۆيرۋس جۇقتىرعان ناۋقاستارعا ارنالعان ەمحانانىڭ ءبىرى جۇمىسىن باستادى. 48 ساعات ىشىندە جۇمىسشىلار مەن ەرىكتىلەر بوس تۇرعان عيماراتتى مىڭ ورىندىق ەمحاناعا اينالدىرعان.
حۋانچجوۋ اۋدانىنداعى اۋرۋحانا عيماراتى باستاپقىدا حۋانگاننىڭ ورتالىق اۋرۋحاناسىنىڭ جاڭا فيليالى رەتىندە سالىنعان جانە مامىر ايىندا اشىلۋى كەرەك بولاتىن.
الايدا جۇما كۇنى جەرگىلىكتى بيلىك بوس تۇرعان عيماراتتى كوروناۆيرۋس جۇقتىرعان ناۋقاستاردى ەمدەيتىن ەمحاناعا اينالدىرۋ تۋرالى شەشىمىن جاريالاعان. جوندەۋ جۇمىستارى سەنبىدە باستالىپ, دۇيسەنبى كۇنى ەمحانا ناۋقاستاردى قابىلداۋعا دايىن بولعان.
جەرگىلىكتى باق-تاعى مالىمەتكە سايكەس, العاشقى ناۋقاستار جاڭا اشىلعان Dabie Mountain ايماقتىق مەديتسينالىق ورتالىعىنا سەيسەنبى كۇنى جەرگىلىكتى ۋاقىتپەن ساعات ون جارىم شاماسىندا كەلىپ تۇسكەن.
اۋرۋحانانى ۋاقىتىندا تاپسىرۋ ءۇشىن 500-دەن استام جۇمىسشى مەن ونداعان اۋىر تەحنيكا ەكى كۇن, ەكى ءتۇن بويى جۇمىلدىرىلعان.
ەمحانا اشىلعان حۋانگان ۋحاننان وڭتۇستىك-باتىسقا قاراي 75 شاقىرىم جەردە ورنالاسقان 7,5 ميلليون حالقى بار قالا. ۆيرۋستان زارداپ شەككەن ايماقتاردىڭ ءبىرى رەتىندە قالادا بەيسەنبى كۇنى ۋحانمەن بىرگە قوعامدىق كولىك قوزعالىسى توقتاتىلىپ, كىرىپ-شىعۋعا تىيىم سالىنعان.
سوڭعى مالىمەتتەرگە سايكەس, قىتايدا ىندەتتەن 131 ادام كوز جۇمعان, ال الەم بويىنشا ۆيرۋستى جۇقتىرعاندار سانى 6000-عا جەتتى.
بۇل اۋرۋحانا العاشقى اشىلعانداردىڭ ءبىرى بولعانىمەن, جوسپاردا سالىنۋعا ءتيىس عيمارات ەمەس. وتكەن بەيسەنبىدە ۋحان بيلىگى ىندەتپەن كۇرەسۋ ماقساتىندا ءبىر اپتا ىشىندە جاڭا اۋرۋحانا سوعاتىنىن مالىمدەگەن ەدى. قازىر ەلدە وزگە 4 ەمحانا سالىنىپ جاتىر نەمەسە قۇرىلىسى اياقتالىپ قالعان.
ءبىر اپتادا اۋرۋحانا تۇرعىزۋ قىتاي بيلىگى ءۇشىن جاڭا ەمەس. وسىعان دەيىن 2003 جىلى پەكيندە اتيپتى پنەۆمونيا (SARS) ىندەتىن ەمدەۋگە 7 كۇندە ارنايى ۋاقىتشا مەديتسينالىق ورتالىق سالىنعان. قىتاي بيلىگى ۋادە ەتكەن تەك كوروناۆيرۋستىڭ جاڭا ءتۇرىن جۇقتىرعان ناۋقاستار جاتاتىن اۋرۋحانانىڭ بارلىعى وسى ورتالىقتىڭ ۇلگىسىندە جۇزەگە اسىپ جاتىر.