دۇنيەجۇزى دەنساۋلىق ساقتاۋ ۇيىمىنىڭ دەرەگى بويىنشا قازىر عالامشاردا قاتەرلىك ىسىك اۋرۋىنا شالدىققان 20 ميلليوننان استام ناۋقاس بار. اتى جامان دەرتتىڭ العاشقى بەلگىسى جىل سايىن 30 مىڭ ادامنىڭ بويىنان انىقتالادى ەكەن. ال قازاقستاندا راك ىسىگى دياگنوزىمەن 180 مىڭنان استام تۇرعىن تىركەلگەن.
جالپى, الەم دارىگەرلەرىنىڭ قاتەرلى ىسىك اۋرۋىمەن كۇرەسۋ ءىسى تولىق جەڭىسپەن اياقتالماسا دا, ادامزات ءۇشىن ءۇمىت ساۋلەسىن جاقتى. ياعني, راك قازىر ادام ءۇشىن ء«ولىم ۇكىمى» تىزىمنەن شىعا باستادى. بۇل جەردەگى جەڭىس تەك مەديتسينانىڭ قولىندا ەمەس, ناۋقاستاردىڭ ءومىر سۇرۋگە قۇشتارلىعى مەن اۋرۋدىڭ الدىن الۋعا دەگەن جاۋاپكەرشلىگىنە دە بايلانىستى ەكەن.
- راك اۋرۋىمەن كۇرەسۋ بارىسىندا مەديتسينا ءۇشىن ناۋقاستىڭ باستاپقى كەزەڭدە كەلگەنى وتە ماڭىزدى. ادام ارى قاراي ەم السا, قاجەتتى شارانى ۇزبەسە, قۇلان تازا ايىعىپ كەتۋىنە 100 پايىز كەپىلدىك بار. ال ادام بويىندا اۋرۋ بەلگىلەرىنىڭ بار, جوعىن تەك مەديتسينالىق تەكسەرۋ كەزىندە عانا انىقتاي الامىز. ول ءۇشىن تۇرعىنداردىڭ ءوز دەنساۋلىعىنا نەمقۇرايلى قاراماي, مۇمكىندىگىنشە ءجيى تەكسەرۋدەن وتكەنى دۇرىس, دەيدى الماتى وبلىسى ايماقتىق ونكولوگيا ديسپانسەرىنىڭ ديرەكتورى ساياحات ولجاەۆ.
وكىنىشكە قاراي, الماتى وبلىسىندا دا تۇرعىنداردىڭ قاتەرلى ىسىكە شالدىعۋ دەرەگى ازايماي وتىر. وتكەن جىلى وڭىردە 2835 ادامعا وسى دەرتتىڭ دياگنوزى قويىلىپتى. ال اۋرۋى اسقانعان 1108 ادامنىڭ اجالىنا اراشا ءتۇسۋ مۇمكىن بولماعان. ستاتيستيكانى ساراپتاعاندا, اتى جامان اۋرۋدىڭ ايەلدەر اراسىندا ءورشىپ كەلە جاتقانى بايقالعان. جالپى راك اۋرۋىنىڭ 20 000 ءتۇرى بار ەكەن. ونىڭ ىشىندە العاشقى تىزىمدە ءسۇت بەزىنىڭ ىسىگى تۇر. جاتىر موينى وبىرىنا شالدىعۋ دا جوعارى. بىلتىر وسى دياگنوز بويىنشا ايماقتىڭ ونكولوگيا ديسپانسەرىندە 238 ناۋقاس ەم قابىلداپتى. اۋرۋ بەلگىلەرى ەرتە انىقتالعان 178 ايەلدىڭ دەرتتەن قۇلان تازا ايىعۋىنا ءۇمىت بار. ال جاعدايى وتە اۋىر 14 ناۋقاس راكتىڭ سوڭعى ستادياسىندا عانا ونكولوگتاردان ەم-دوم ىزدەپ كەلگەن ەكەن.