قازاقستان رەسپۋبليكاسى ۇكىمەتىنىڭ 2020 جىلعى 27 قاڭتارداعى №10 قاۋلىسىمەن قىتاي حالىق رەسپۋبليكاسىنىڭ ازاماتتارى ءۇشىن بۇرىن ەنگىزىلگەن قازاقستان رەسپۋبليكاسىنا كىرۋ, بولۋ جانە كەتۋ ءۇشىن جەتپىس ەكى ساعاتتىق ۆيزاسىز رەجيم 2020 جىلدىڭ 1 شىلدەسىنە دەيىن توقتاتىلدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.
وسىلايشا, اتالعان قاۋلى ارقىلى نۇر-سۇلتان, الماتى, شىمكەنت, اقتاۋ, قاراعاندى جانە تاراز قالالارىنىڭ حالىقارالىق اۋەجايلارى ارقىلى ترانزيتپەن وتەتىن قىتاي حالىق رەسپۋبليكاسىنىڭ ازاماتتارى ءۇشىن قازاقستان رەسپۋبليكاسىنا كەلۋدىڭ, بولۋدىڭ جانە ودان كەتۋدىڭ جەتپىس ەكى ساعاتتىق ۆيزاسىز رەجيمىنىڭ قولدانىلۋى بولىگىندە قازاقستان رەسپۋبليكاسى ۇكىمەتىنىڭ 2012 جىلعى 21 قاڭتارداعى № 148 قاۋلىسىمەن بەكىتىلگەن كوشىپ كەلۋشىلەردىڭ قازاقستان رەسپۋبليكاسىنا كەلۋىنىڭ جانە وندا بولۋىنىڭ, سونداي-اق ولاردىڭ قازاقستان رەسپۋبليكاسىنان كەتۋىنىڭ قاعيدالارىنىڭ 26-1-تارماعىنىڭ قولدانىلۋى 2020 جىلعى 1 شىلدەگە دەيىن توقتاتىلا تۇرسىن.
بۇل شارا ناۋقاستار مەن اۋرۋ جۇقتىرىلعان ادامداردىڭ قازاقستان رەسپۋبليكاسىنا كەلۋ قاۋپىنىڭ جوعارىلاۋىن ەسكەرە وتىرىپ, سونىمەن قاتار قازاقستان رەسپۋبليكاسىنىڭ اۋماعىندا پنەۆمونيانىڭ تارالۋىن بولدىرماۋ ءۇشىن قابىلدانعانىن ايتا كەتكەن ءجون.
سونىمەن قاتار قازاقستان رەسپۋبليكاسىنىڭ مادەنيەت جانە سپورت مينيسترلىگى قازاقستان رەسپۋبليكاسىنىڭ ازاماتتارىنا ۋحانعا جانە حۋبەي پروۆينتسياسىنا, سونداي-اق جالپى قحر-نىڭ باسقا اۋماقتارىنا بارۋدان باس تارتۋعا كەڭەس بەرەدى.