سولتۇستىك قازاقستان وبلىسىنىڭ پوليتسيا دەپارتامەنتىندە وتكەن اپپاراتتىق كەڭەستە ايىرتاۋ اۋدانىندا وتكەن جىلدىڭ جەلتوقسان ايىندا بولعان ءورت كەزىندە ەكى ايەل مەن ءتورت بالانى قۇتقارعان ەكى پاترۋلدىك پوليتسەي ماراپاتتالدى.
پوليتسيا دەپارتامەنتىنىڭ پاترۋلدىك پوليتسيا باتالونىنىڭ ينسپەكتورلارى پوليتسيا لەيتەنانتى ەرلان دانكين مەن پوليتسيا كىشى لەيتەنانتى ازامات بۋكۋەۆ وبلىستىڭ ايىرتاۋ اۋدانىندا «كوكشەتاۋ-رۋزاەۆكا» تراسساسىندا قىزمەت كورسەتكەن. 2019 جىلدىڭ جەلتوقسان ايىندا پوليتسيا وفيتسەرلەرى قىزمەت اتقارۋ كەزىندە ادامداردى امان الىپ قالدى. ىشكى ىستەر ءمينيسترى, پوليتسيا گەنەرال-لەيتەنانتى ەرلان تۇرعىمباەۆتىڭ بۇيرىعىمەن پاترۋلدىك پوليتسەيلەر «ورتتە كورسەتكەن قايسارلىعى ءۇشىن» مەدالدارىمەن ماراپاتتالدى.
21 جەلتوقسان كۇنى ەرلان دانكين مەن ازامات بۋكۋەۆ مىنگەن كولىك ءپاترۋلى جانار-جاعارماي قۇيىپ الۋ ءۇشىن اۋدان ورتالىعى ساۋمالكولگە كەلەدى. كەنەت ولار وتتىڭ جالىنىن بايقاپ قالادى. ساقشىلار ساناۋلى مينۋت ىشىندە ءورت ورنىنا جەتىپ, قىزىل جالىنعا ورانعان ءۇيدىڭ ىشىنەن ەكى ايەل مەن ءتورت بالانى الىپ شىعادى. ارالارىندا 8 ايلىق كىشكەنتاي بوبەك تە بولعان. پوليتسيا قىزمەتكەرلەرىنىڭ بىلىكتى ءارى جىلدام ارەكەتتەرىنىڭ ارقاسىندا ەشكىم زارداپ شەكپەگەن.
وبلىستىق پوليتسيا دەپارتامەنتىنىڭ باستىعى پوليتسيا پولكوۆنيگى مارات تولەباەۆ ايىرتاۋلىق ساقشىلاردى ماراپاتتاۋ كەزىندە پاترۋلدىك قىزمەتتىڭ كۇن سايىن تۇرعىندارمەن تىعىز بايلانىستا ەكەنىن اتاپ ءوتتى. سوندىقتان وسى ءبولىنىس قىزمەتكەرلەرى توتەنشە جاعداي ورىن العان كەزدە وقيعا ورنىنا العاشقىلاردىڭ ءبىرى بولىپ جەتەدى. «ەرلان دانكين مەن ازامات بۋكۋەۆتىڭ كاسىبي ارەكەتتەرى وزگە قىزمەتكەرلەر ءۇشىن, اسىرەسە, جاس ماماندار ءۇشىن ۇلگى بولۋى ءتيىس. ءبىز ءبىرىنشى كەزەكتە ادامدارعا قىزمەت كورسەتىپ, كومەكتەسۋىمىز قاجەت» دەدى وبلىستىق پوليتسيا باسشىسى ماراپاتتاۋ كەزىندە.